Sejko: Depozitat e qytetarëve janë të sigurta, sistemi bankar vijon normalisht aktivitetin

Drejtuesit e institucioneve bankare kanë zhvilluar ditën e sotme një takim me guvernatorin e Bankës së Shqipërisë, Gent Sejko, kryeministrin Edi Rama dhe ministrin e Financave dhe Ekonomisë. Në fokus të diskutimeve ishte situata e krijuar në vend dhe garantimi i vijimësisë normale të funksionimit të sistemit bankar nga ngjarjet e protestave.

Në nisje të takimit, guvernatori i Bankës së Shqipërisë, Gent Sejko, garantoi bizneset dhe qytetarët se sistemi bankar vijon operimin normal dhe do të vazhdojë t’u përgjigjet kërkesave të ekonomisë dhe qytetarëve, në funksion të vijimësisë së aktivitetit të përditshëm.

Sejko theksoi se Banka e Shqipërisë i ka pasur në funksion të gjitha sistemet operacionale, përfshirë sistemin e pagesave dhe qarkullimin e parasë fizike. Sipas tij, edhe funksionet e tjera të institucionit kanë vijuar të kryhen normalisht në çdo kohë.

“Banka e Shqipërisë, siç jeni në dijeni, i ka pasur në funksion të gjitha sistemet operacionale, përfshirë sistemin e pagesave dhe qarkullimin e parasë fizike. Edhe funksionet e tjera kemi vijuar t’i kryejmë normalisht në çdo kohë.

Pavarësisht tensionit dhe presionit në sistemin bankar, ashtu siç kemi nënvizuar edhe në komunikimet tona, depozitat janë të sigurta. Asnjë ngjarje nuk i cenon depozitat e qytetarëve. Bankat janë të mirëkapitalizuara dhe kanë likuiditet të mirë.

Sistemi bankar dhe bankat janë në funksion normal të bizneseve dhe qytetarëve.

Dëmtimi apo cenimi i sistemit bankar dhe financiar cenon drejtpërdrejt qytetarët dhe bizneset. Krijon problematika që kanë të bëjnë me jetën e gjithsecilit, veprimtarinë dhe vazhdimësinë e aktivitetit të tyre.

Shqetësimi ynë është që kjo industri të vijojë pa ndërprerje aktivitetin, pasi pasojat do të ishin zinxhir në të gjithë ekonominë”, nënvizoi Guvernatori Gent Sejko.