Edi Rama ka deklaruar se gjatë protestave të ditëve të fundit në Tiranë janë parandaluar skenarë që, sipas tij, mund të çonin në përsëritjen e 21 Janarit të viti 2011, ku gjatë një proteste të organizuar nga Partia Socialiste, (e cila në atë kohë ishte në opozitë), kundër qeverisë së Sali Berishës, u vranë 4 protestues.
Gjatë një takimi me drejtuesit e bankave të nivelit të dytë, Rama i cilësoi protestat si akte dhune të organizuara, për të cilat pretendoi se ka pasur skenare të rënda për sulme me dronë me eksploziv, që sipas tij janë neutralizuar nga qeveria.
“Kemi pasur informacion për skenarë më të këqij, për të provokuar një tjetër 21 Janar. Kemi qenë të vetëdijshëm për këtë. Kemi neutralizuar edhe sulm me dron me eksploziv ndaj Kryeministrisë. Ka qenë një vijë e kuqe shumë e qartë për të gjithë”,- deklaroi Rama.
Sa i takon të rinjve protestues, Rama i cilësoi si “vandalë”, të verbër e të manipuluar.
“Edhe ata që janë me kapuç janë fëmijët e këtij vendi, të verbër e të braktisur ndoshta edhe nga familja e vet…”, tha Rama.
Protestat në Tiranë vijojnë prej disa ditësh, ndërsa demonstruesit kërkojnë dorëheqjen e Ramës. Tubimet janë shoqëruar me përplasje mes protestuesve dhe Policisë, ku ka pasur episode të rënda dhune, me thyerje gjymtyrësh e të shtëna me plumba gome. Ata kanë deklaruar se revolta do të vazhdojë deri në largimin e Ramës.
