Interesi i obligacioneve 10-vjeçare të qeverisë franceze tejkalon 5%, për herë të parë që nga 2002

Yield-i i obligacioneve 10-vjeçare të qeverisë franceze, që shërbejnë si instrument referencë, tejkaloi nivelin 5% të mërkurën, ndërsa investitorët kërkojnë një kthim më të lartë për të mbajtur borxhin e vendit.

Normat e kthimit të obligacioneve franceze kanë qenë në rritje prej javësh, ndërsa ligjvënësit përplasen për buxhetin e vitit 2027, i cili parashikon miliarda euro shkurtime shpenzimesh për të ulur borxhin publik, që tashmë ka arritur në rreth 120% të Prodhimit të Brendshëm Bruto (PBB) të Francës. Ky është një nga nivelet më të larta në Eurozonë dhe shumë mbi kufirin prej 60% të vendosur nga Bashkimi Europian.

Obligacionet OAT të Thesarit të Francës përdoren gjithashtu si referencë për përcaktimin e normave të interesit në një pjesë të gjerë të ekonomisë, çka do të thotë se kostot e huamarrjes mund të fillojnë të rriten për bizneset dhe familjet.

Hera e fundit që norma e kthimit kishte arritur një nivel kaq të lartë ishte gjatë krizës financiare të lidhur me shpërthimin e flluskës së kompanive të internetit (dot-com).

Diferenca mes normës së kthimit të obligacioneve 10-vjeçare franceze dhe atyre 10-vjeçare gjermane, që konsiderohen pikë referimi për besueshmërinë kreditore në Europë, u rrit gjithashtu ndjeshëm, duke iu afruar 160 pikëve bazë.

Shitja masive e obligacioneve ushtron presion të mëtejshëm mbi qeverinë, në prag të vendimit që agjencia e vlerësimit Moody’s pritet të marrë të premten për vlerësimin e kreditit sovran të Francës. Shumica e ekonomistëve presin një ulje të vlerësimit, e cila do të rriste automatikisht kostot e huamarrjes së qeverisë.

Kryeministri Sébastien Lecornu po përpiqet të sigurojë miratimin e buxhetit të vitit 2027 në Parlament, megjithëse nuk ka një shumicë politike për të mbështetur shkurtimet e shpenzimeve prej 43 miliardë eurosh që ai synon të realizojë.

Edhe nëse miratohet, buxheti do ta ulte deficitin e Francës vetëm në 5% të PBB-së vitin e ardhshëm, shumë mbi kufirin prej 3% të përcaktuar për vendet anëtare të Bashkimit Europian.

Ndërkohë, protestat e fundjavës, ku pjesëmarrësit kërkonin ndër të tjera më shumë shpenzime për shkollat dhe shërbimet e tjera publike, degjeneruan në aktet më të rënda të dhunës në rrugë që janë parë prej vitesh. / Euronews