Shiloh Jolie, vajza 20-vjeçare e Angelina Jolie dhe Brad Pitt, është sërish në qendër të vëmendjes pas një daljeje në Los Angeles, ku një detaj në pamjen e saj ka rikthyer në kujtesë stilin e guximshëm të së ëmës.
Sipas TMZ, Shiloh u fotografua të dielën, më 18 tetor, me një piercing në buzën e poshtme, një aksesor që të kujton pamjen e Angelina Jolie-s në premierën e filmit “Eternals” të Marvel në vitin 2021. Në atë event, aktorja u shfaq me një aksesor metalik që zgjatej nga buza deri te mjekra.
E veshur në mënyrë të thjeshtë dhe larg shkëlqimit të tapeteve të kuq, Shiloh tërhoqi vëmendjen pikërisht me këtë detaj, që ka nxitur krahasimet me të ëmën e famshme.
Pavarësisht interesit të vazhdueshëm të publikut, Shiloh ka zgjedhur të mbajë një profil të ulët dhe të jetojë larg vëmendjes së tepërt mediatike. Angelina Jolie ka treguar më herët se disa prej fëmijëve të saj preferojnë të qëndrojnë prapa kamerave dhe se Shiloh e vlerëson veçanërisht privatësinë.
Shiloh është një nga gjashtë fëmijët e Angelina Jolie-s dhe Brad Pitt-it. Ajo lindi më 27 maj 2006 dhe, në ditëlindjen e saj të 18-të, nisi procedurat ligjore për të hequr mbiemrin e të atit, duke zgjedhur të quhet Shiloh Jolie.
Edhe disa nga motrat dhe vëllezërit e saj kanë ndërmarrë hapa për të mos përdorur më mbiemrin Pitt, ndërsa marrëdhëniet mes ish-çiftit të famshëm kanë qenë prej vitesh në qendër të vëmendjes për shkak të ndarjes dhe mosmarrëveshjeve ligjore.
