Japonia po përjeton temperatura të pazakonta për fundin e tetorit, me termometrat që kanë kaluar 30°C në Tokio dhe Osaka. Në të dy qytetet janë regjistruar rekorde të reja për këtë periudhë të vitit, duke shënuar një tjetër episod të motit të pazakontë në vend.
Në kryeqytetin japonez, temperaturat kaluan 30°C gjatë orëve të para të pasdites së së hënës. Sipas të dhënave meteorologjike, kjo është hera e parë që prej nisjes së regjistrimeve, në vitin 1875, që në Tokio shënohet një temperaturë kaq e lartë në këtë fazë të muajit tetor. Rekordi i mëparshëm ishte regjistruar më 19 tetor 2024.
Situata ishte e ngjashme edhe në Osaka, qytetin e dytë më të madh të Japonisë, ku temperaturat mbi 30°C thyen rekordin e mëparshëm, të vendosur më 20 tetor 1933. Matjet meteorologjike për këtë rajon kanë nisur në vitin 1883.
Agjencia Meteorologjike e Japonisë i cilëson si “Manatsubi”, ose “ditë vere”, ditët kur temperaturat arrijnë apo kalojnë 30°C. Regjistrimi i vlerave të tilla në fund të tetorit nxjerr në pah kontrastin me kushtet që priten zakonisht gjatë kësaj periudhe të vitit.
Shkencëtarët paralajmërojnë se ndryshimet klimatike të shkaktuara nga aktiviteti njerëzor po shtojnë shpeshtësinë dhe intensitetin e valëve të të nxehtit në mbarë botën. Temperaturat e larta jashtë sezonit konsiderohen një tjetër tregues i ndryshimeve që po pëson klima globale.
Japonia regjistroi gjithashtu verën më të nxehtë që prej fillimit të matjeve meteorologjike, në vitin 2025. Më 5 gusht të atij viti, në qytetin Isesaki, në veri të Tokios, termometri arriti në 41,8°C, duke shënuar një tjetër rekord të temperaturave ekstreme në vend.