Unioni Turistik Shqiptar ka reaguar për protestat e studentëve dhe të rinjve në Tiranë dhe qytete të tjera të vendit, duke kërkuar ruajtjen e paqes sociale, shmangien e përshkallëzimit të situatës dhe nisjen e dialogut mes qeverisë dhe përfaqësuesve të studentëve.

Në deklaratën e tij, Unioni shpreh shqetësimin për përplasjet dhe tensionet e ditëve të fundit, të cilat kanë sjellë të lënduar mes protestuesve dhe forcave të rendit. Organizata thekson se e drejta për të protestuar dhe për të shprehur pakënaqësinë është një vlerë themelore demokratike, por u bën thirrje pjesëmarrësve që të ruajnë karakterin paqësor të tubimeve dhe të shmangin veprimet që cenojnë sigurinë e qytetarëve apo dëmtojnë bizneset private.

Sipas Unionit, bizneset dhe investimet në sektorin e turizmit përfaqësojnë punën dhe kursimet e shumë sipërmarrësve e familjeve shqiptare, ndaj mbrojtja e tyre duhet të jetë përgjegjësi e përbashkët, përtej ndasive politike.

Organizata nënvizon gjithashtu se shqetësimet e të rinjve lidhen drejtpërdrejt me të ardhmen e industrisë turistike, e cila ka nevojë për punonjës të kualifikuar. Sipas saj, krijimi i mundësive për të rinjtë që të qëndrojnë dhe të punojnë në Shqipëri është i rëndësishëm si për zhvillimin e sektorit, ashtu edhe për dhjetëra mijëra familje që sigurojnë të ardhurat përmes tij.

Një tjetër shqetësim i ngritur në deklaratë lidhet me pasojat që pamjet e dhunës dhe pasigurisë mund të kenë në perceptimin ndërkombëtar për Shqipërinë. Unioni paralajmëron se këto zhvillime rrezikojnë imazhin e vendit, besimin e turistëve dhe marrëdhëniet me operatorët e huaj, të cilët, sipas tij, e kanë vlerësuar Shqipërinë për mikpritjen dhe sigurinë.

Unioni Turistik Shqiptar dënon gjithashtu çdo përdorim të pajustifikuar ose joproporcional të forcës nga policia ndaj protestuesve, duke theksuar se garantimi i rendit publik nuk duhet të cenojë integritetin fizik, dinjitetin dhe të drejtat themelore të qytetarëve.

Në thirrjen drejtuar institucioneve, organizata kërkon që drejtuesit e shtetit të shmangin retorikën nxitëse dhe të krijojnë hapësirë për një zgjidhje të negociuar, me synimin për të ndalur përshkallëzimin dhe për të shmangur pasoja më të rënda për qytetarët dhe ekonominë.

“Zëri i të rinjve duhet të dëgjohet me seriozitet dhe respekt nga institucionet shtetërore”, thekson Unioni, duke shtuar se qeveria duhet të hapë rrugën e dialogut, ndërsa studentët duhet të zgjedhin përfaqësuesit e tyre për të zhvilluar negociatat.

Në përfundim, organizata apelon për përgjegjësi dhe vetëpërmbajtje nga të gjitha palët, me qëllim uljen e tensioneve dhe garantimin e paqes sociale, sigurisë dhe vazhdimësisë së zhvillimit ekonomik të vendit.