Gresa Krasniqi, vajza e ish-kryetarit të Kuvendit të Kosovës, Jakup Krasniqi, ka bërë të ditur se babai i saj ka refuzuar kontrollet mjekësore në Hagë dhe i ka komunikuar se nuk do të pranojë më kujdes shëndetësor nga institucionet ku mbahet.

Në një reagim publik, një muaj pas dënimit të Krasniqit me 25 vjet burgim nga Dhomat e Specializuara të Kosovës në Hagë, e bija ka treguar përmes një postimi se çfarë i kishte thënë ai gjatë një bisede telefonike.

“Erdhën disa doktorë për të më kontrolluar, natyrisht që i refuzova. Jam këtu pa të drejtë, më është mohuar çdo e drejtë njerëzore tash e gjashtë vjet, prandaj nuk më duhet as kujdesi i tyre. Ju të jeni të informuar se unë nuk do të pranoj më asnjë kujdes nga ana e tyre”, ka cituar Gresa fjalët e të atit.

Ajo ka shprehur shqetësimin për gjendjen e tij, duke theksuar se mosha e Krasniqit e bën të nevojshëm kujdesin e veçantë.

“Si bijë, natyrisht që u shqetësova. Babi është në një moshë kur ka nevojë për kujdes të veçantë”, ka shkruar ajo.

Gresa Krasniqi ka rrëfyer gjithashtu se ndihet e pafuqishme përballë vendimit të të atit, duke vënë në pikëpyetje se si mund ta bindë atë të pranojë kujdesin mjekësor nga institucionet, ndaj të cilave ai shpreh mosbesim.

“Si mund t’i kërkoj të pranojë kujdesin e atyre institucioneve, kur ai ndihet i tradhtuar pikërisht nga drejtësia që duhej ta mbronte?”, ka deklaruar ajo.

Gjatë bisedës telefonike, e bija thotë se arriti t’i përcillte vetëm fjalë mbështetjeje: “Ne jemi këtu, Babi. Të duam të fortë, të duam të shëndetshëm”.

Në përfundim të reagimit të saj, Gresa Krasniqi e ka kundërshtuar ashpër dënimin e të atit, duke e cilësuar atë si padrejtësi.

“Dënimi i Babit nuk është një gabim që pret të korrigjohet. Është një padrejtësi!”, ka përfunduar ajo.