Partitë e ekstremit të djathtë në Europë po përpiqen të shfrytëzojnë pakënaqësitë sociale dhe trazirat e dhunshme për të forcuar pozitat e tyre politike, duke e lidhur pasigurinë ekonomike me emigracionin dhe duke premtuar masa më të ashpra për rivendosjen e rendit. Kështu vlerëson një analizë e publikuar nga gazeta britanike “The Guardian”, sipas së cilës valët e protestave po përdoren për të promovuar një agjendë më autoritare.
Pakënaqësitë për koston e lartë të jetesës, çmimet e karburantit dhe inflacionin kanë nxitur protesta në vende të ndryshme europiane. Sipas analizës, udhëheqësit nacionalistë po përpiqen t’i paraqesin këto zhvillime si pasojë të dështimit të qeverive liberale dhe të politikave të emigracionit, duke pretenduar se vetëm forcat e tyre mund të garantojnë ligjin dhe rendin.
Kjo strategji politike merr rëndësi të veçantë në një kohë kur në disa vende të kontinentit priten zgjedhje të rëndësishme. Partitë nacionaliste synojnë të përfitojnë nga pakënaqësia publike dhe shqetësimet për sigurinë, duke e vendosur emigracionin në qendër të debatit politik.
Në Francë, trazirat dhe zemërimi për çmimet e karburantit kanë ndikuar në klimën politike, ndërsa forcat nacionaliste dhe të ekstremit të djathtë kërkojnë të zgjerojnë mbështetjen e tyre. Përballë tensioneve, autoritetet kanë shtuar masat e sigurisë dhe kanë parashikuar angazhimin e trupave ushtarake.
Edhe në Gjermani, partia Alternativa për Gjermaninë (AfD) ka fituar terren në disa lande, duke nxitur shqetësime për rritjen e ndikimit të së djathtës ekstreme. Në të njëjtën kohë, kundër kësaj tendence janë zhvilluar protesta të mëdha në mbrojtje të demokracisë.
Në Itali, qeveria e Giorgia Melonit ka diskutuar masa shtesë sigurie për menaxhimin e përplasjeve dhe trazirave në qytetet veriore, përfshirë Milanon dhe Bolonjën. Në këtë klimë, forcat populiste dhe të djathta po e vendosin theksin te kërkesat për kontroll më të fortë të rendit publik.
Sipas këndvështrimit të paraqitur nga “The Guardian”, rreziku qëndron te përdorimi politik i krizave sociale dhe i dhunës për të legjitimuar masa më autoritare dhe politika më të ashpra kundër emigracionit. Kështu, pakënaqësitë që lidhen me ekonominë dhe kushtet e jetesës po kthehen gjithnjë e më shumë në terren për përplasje politike mbi sigurinë, kufijtë dhe të ardhmen e demokracive europiane.