Një automjet është përfshirë nga flakët në lëvizje në aksin rrugor Kardhiq-Delvinë, në vendin e quajtur “Skërficë”.
Si pasojë e zjarrit, drejtuesi i mjetit, 37-vjeçari Maridon Dhuli, ka pësuar djegie të rënda të shkallës së tretë.
Ngjarja ka ndodhur mbrëmjen e djeshme, kur automjeti tip “Volkswagen Touran”, me të cilin udhëtonte Dhuli, banues në fshatin Fterrë të Himarës, ka marrë flakë gjatë lëvizjes.
Pas ngjarjes, disa kalimtarë i kanë ardhur në ndihmë 37-vjeçarit. Ai është dërguar fillimisht në urgjencën e Sarandës, ku ka marrë ndihmën e parë mjekësore. Për shkak të djegieve të rënda, ai është transportuar më pas me ambulancë drejt Tiranës, për trajtim më të specializuar.
Për shuarjen e zjarrit që përfshiu automjetin është dashur ndërhyrja e shërbimit zjarrfikës.
Ndërkohë, policia ka nisur hetimet për të zbardhur shkaqet dhe rrethanat e ngjarjes.
