Carlos Augusto po kalon një nga periudhat më të mira që prej transferimit te Interi. Me katër gola të shënuar mes Serie A dhe Champions League, braziliani është aktualisht golashënuesi i dytë më i mirë i zikaltërve këtë sezon, pas Lautaro Martinezit.

Mbrojtësi i krahut ka rezultuar sërish vendimtar për skuadrën italiane, duke konfirmuar formën e tij të shkëlqyer dhe rëndësinë që ka fituar në ekip.

Pas ndeshjes së fundit, në të cilën Interi siguroi një fitore të rëndësishme ndaj Shakhtarit, Carlos Augusto vlerësoi karakterin e treguar nga skuadra, duke theksuar se ekipi dinte të vuante në momentet e vështira.

“Ishte një fitore shumë e rëndësishme. Kemi treguar se dimë edhe të vuajmë”, u shpreh braziliani pas përfundimit të takimit.

Ai nuk e fshehu kënaqësinë për momentin që po përjeton me fanellën zikaltër, duke e cilësuar këtë periudhë si më të mirën e aventurës së tij tek Interi.

“Po kaloj momentin më të mirë që prej ardhjes sime te Interi. Për golin bëra vrapimin e jetës sime”, deklaroi Carlos Augusto, duke iu referuar aksionit që e bëri sërish protagonist.

Rinovimi i kontratës, braziliani qetëson tifozët

Përveç paraqitjeve në fushë, vëmendje ka marrë edhe e ardhmja e tij te Interi. I pyetur për mundësinë e rinovimit të kontratës, Carlos Augusto konfirmoi se bisedimet janë në zhvillim, por kërkoi qetësi.

“Rinovimi? Jemi duke biseduar, rrini të qetë!”, u shpreh ai me humor.

Kështu, braziliani vazhdon të fitojë rëndësi në projektin zikaltër, ndërsa shifrat e tij në këtë fillim sezoni dëshmojnë se kontributi i tij nuk kufizohet vetëm në detyrat mbrojtëse. Me katër gola në dy kompeticione, Carlos Augusto po kthehet në një armë të rëndësishme për Interin.