Publikimi i pamjeve nga kamerat trupore të policisë ka rikthyer vëmendjen te një ngjarje tragjike në Misisipi të Shteteve të Bashkuara, ku një foshnjë vetëm një vjeç humbi jetën nga të shtënat e një efektivi gjatë një ndërhyrjeje policore.
Viktima është Kohen Wiley, i cili ndodhej në automjet së bashku me nënën e tij, Velesiya Wiley, dhe një grua tjetër, Latoya Ferrell. Incidenti ndodhi më 14 qershor 2026, në qytetin Senatobia, pranë Memfisit, pasi autoritetet u njoftuan për një vjedhje të dyshuar të një pakoje pelenash në një dyqan Walmart.
Në videon e bërë publike shfaqen momentet kur efektivët afrohen dhe rrethojnë automjetin, duke u kërkuar dy grave të ndalojnë. Situata përshkallëzohet kur drejtuesja e makinës kryen një manovër që, sipas policisë, rrezikonte jetën e oficerëve.
Në këto rrethana, një prej efektivëve hap zjarr ndaj automjetit. Plumbat godasin foshnjën, e cila ndodhej në krahët e nënës, si dhe plagosin Latoya Ferrell.
Sipas dokumenteve të hetimit, Velesiya Wiley e kishte marrë fëmijën në krahë për t’u treguar policëve se brenda makinës ndodhej një foshnjë.
Oficeri i identifikuar si Hunter Foster është personi që qëlloi drejt automjetit, duke shkaktuar vdekjen e njëvjeçarit. Byroja e Hetimeve e Misisipit, e ngarkuar me zbardhjen e rrethanave të incidentit, arriti në përfundimin se drejtuesja e automjetit kishte lëvizur në drejtim të policëve, duke krijuar rrezik për përplasjen e njërit prej tyre.
Më 19 tetor, zyra e Prokurores së Përgjithshme të Misisipit, Lynn Fitch, njoftoi përfundimin e hetimit, duke vlerësuar se përdorimi i armës nga oficeri ishte i justifikuar. Autoritetet vendosën të mos ngrinin akuza penale, duke argumentuar se nuk kishte prova të mjaftueshme për ndjekje penale. Megjithatë, ky përfundim është kundërshtuar nga familjarët e viktimës dhe përfaqësuesi i tyre ligjor.
Avokati i njohur i të drejtave civile, Ben Crump, ka vënë në dyshim versionin zyrtar të ngjarjes, duke publikuar rezultatet e një ekspertize të pavarur mjekoligjore.
Sipas autopsisë së paraqitur prej tij, foshnja ishte goditur nga një plumb që kishte hyrë nga ana anësore e automjetit dhe jo nga pjesa ballore, një element që, sipas avokatit, ngre pikëpyetje mbi pozicionin e efektivit dhe domosdoshmërinë e përdorimit të armës.
Pamjet e reja rikthejnë debatet mbi ndërhyrjen e policisë. Videoja e publikuar më 21 tetor ka shkaktuar reagime në rrjetet sociale, ku përdorues të shumtë kanë kërkuar sqarime mbi mënyrën se si një ndërhyrje për një vjedhje të dyshuar përfundoi me vdekjen e një fëmije.
Në qendër të debatit mbetet kundërshtia mes përfundimeve të autoriteteve, të cilat e konsiderojnë të justifikuar përdorimin e forcës, dhe pretendimeve të familjes, që kërkon përgjegjësi për vdekjen e foshnjës.
