SPAK ka sekuestruar pasuri me vlerë 77 milionë lekë në kuadër të një hetimi për trafik narkotikësh dhe pastrim parash. Mes pasurive të sekuestruara janë 25 automjete, 100% e kuotave të një kompanie dhe një tokë arë në Tiranë. Në kuadër të procedimit penal janë caktuar masa sigurimi personal ndaj 16 personave. Prokuroria e Posaçme kundër Korrupsionit dhe Krimit të Organizuar ka sekuestruar pasuri të luajtshme dhe të paluajtshme me vlerë totale 77 milionë lekë, në kuadër të procedimit penal nr. 187/2023, që lidhet me hetimet për trafik narkotikësh, pastrim parash dhe grup të strukturuar kriminal.
Sipas njoftimit zyrtar, me vendimin nr. 667, datë 14 tetor 2026, Gjykata e Posaçme e Shkallës së Parë caktoi masën e sigurimit pasuror “sekuestro preventive” mbi pasuritë në emër të shtetasve A.Ç. dhe F.C. Hetimi pasuror ka identifikuar prona dhe asete që dyshohet se janë produkte të veprimtarisë kriminale dhe që rezultojnë në emër të personave nën hetim dhe familjarëve të tyre. Në emër të shtetasit A.Ç. është sekuestruar një tokë arë me sipërfaqe 2,000 metra katrorë, e ndodhur në Sharrë, Tiranë.
Ndërsa në emër të shtetasit F.C. janë sekuestruar 100% e kuotave të një shoqërie tregtare me adresë në rrugën e Dibrës, Tiranë. Në pronësi të kompanisë janë gjithsej 25 automjete: 24 automjete Volkswagen, të modeleve të përmendura në njoftimin e SPAK si Ioniq 5, ID.3 dhe ID.4, si dhe një Toyota, modeli bZ3.
Sipas SPAK, hetimet kanë zbuluar veprimtarinë e një organizate kriminale me shtrirje të gjerë ndërkombëtare, e cila bashkëpunonte me grupe të tjera kriminale për të transportuar lëndë narkotike drejt porteve europiane. Fitimet e dyshuara nga aktiviteti kriminal investoheshin në prona dhe biznese në Shqipëri dhe jashtë saj.
Hetimi është zhvilluar në bashkëpunim me EUROPOL-in dhe autoritetet e Belgjikës, Francës, Holandës, Gjermanisë dhe Italisë. Një rol të rëndësishëm në hetime ka pasur analiza e komunikimeve të enkriptuara në platformën SkyECC.
Nga hetimet janë zbuluar dërgesa shumëtonëshe kokaine nga Amerika Latine drejt porteve kryesore të Bashkimit Europian, përfshirë Hamburgun dhe Antverpenin. Sipas prokurorisë, janë identifikuar gjithashtu rolet e personave të dyshuar dhe është dokumentuar zinxhiri i transferimit të parave të përfituara nga veprimtaria e paligjshme. Procedimi penal përfshin veprat penale të trafikimit të lëndëve narkotike, pastrimit të produkteve të veprës penale, grupit të strukturuar kriminal dhe kryerjes së veprave penale nga organizata kriminale ose grupi i strukturuar kriminal. Në kuadër të këtij procedimi janë caktuar masa sigurimi personal ndaj 16 personave.
Sekuestrohen pasuri me vlerë 77 milionë lekë në kuadër të procedimit penal 187/2023 për trafik narkotikësh dhe pastrim parash
Prokuroria e Posaçme kundër Korrupsionit dhe Krimit të Organizuar në kuadër të procedimit penal nr. 187 të vitit 2023 ka zhvilluar paralelisht edhe hetimin pasuror. Ky hetim ka identifikuar pasuri që përbëjnë produkte të veprimtarisë kriminale në emër të subjekteve në hetim dhe familjarëve të tyre.
Me vendimin nr.667, datë 14.10.2026, Gjykata e Posaçme e Shkallës së Parë caktoi masën e sigurimit pasuror “sekuestro preventive” mbi pasuri të luajtshme dhe të paluajtshme në emër të shtetasve A.Ç. dhe F.C., me vlerë totale 77.000.000 lekë.
Pasuria nr. 349/47, zona kadastrale 3321, vol. 12, faqja 5, “Tokë Arë”, me sipërfaqe 2000 m2, e ndodhur në Sharrë, Tiranë, në pronësi edhe të shtetases A.Ç.
Kuota 100% të shoqërisë tregtare ‘Check Company Sh.p.k, në rrugën e Dibrës, Tiranë.
Gjithsej janë 24 automjete Volkswagen (modeli Ioniq5 dhe ID3, ID4 ) dhe 1 Toyota (modeli bZ3) në pronësi të kësaj kompanie.
Procedimi penal nr. 187/2023 përfshin veprat penale të parashikuara nga nenet 283/a, 287, 333/a dhe 334 të Kodit Penal:
Pastrim i produkteve të veprës penale;
Kryerje e veprave penale nga organizata kriminale dhe grup i strukturuar kriminal.
Shtetasit nën hetim janë: E.Ç, A.Ç, A.Ç (alias D.Ç), F.B (alias J.B), D.D, P.L (alias P.S.), F. G (alias F.Ç, alias F.H.Ç, S.P (alias V.P), G.Ç, R.M, M.K, M. M, E. Ç, R.Ç, K.Gj dhe D.P.
Organizata kriminale me shtrirje të gjerë ndërkombëtare bashkëpunonte me grupe të tjera kriminale për të lehtësuar transportet e lëndëve narkotike drejt porteve evropiane dhe investonte fitimet e mëdha në prona dhe biznese në Shqipëri dhe jashtë saj. Hetimet përfshinë bashkëpunimin intensiv me EUROPOL dhe autoritete nga Belgjika, Franca, Holanda, Gjermania dhe Italia, u bazuan në analizën e të dhënave të komunikimit të enkriptuara të platformës SkyECC. Nga këto hetime janë zbuluar dërgesa shumëtonëshe kokaine nga Amerika Latine drejt porteve kryesore të BE-së, përfshirë Hamburgun, Anversin etj. Gjithashtu janë evidentuar rolet përkatëse të secilit prej pjesëtarëve të grupit kriminal si dhe është dokumentuar i gjithë zinxhiri i transferimit të shumave monetare të përfituara nga aktiviteti kriminal.
Në kuadër të këtij procedimi penal janë caktuar masa të sigurimit personal ndaj 16 personave.