Federata Turke e Futbollit (TFF) ka pezulluar për 45 ditë gjithsej 147 zyrtarë aktualë dhe ish-zyrtarë të klubeve, për shkelje të rregullave që lidhen me bastet sportive, raporton Reuters.
Vendimi disiplinor vjen pas një hetimi të gjerë ndaj 448 zyrtarëve, të cilët ishin referuar nga federata nën dyshimet se kishin vendosur baste gjatë kohës kur ushtronin funksione në klubet e elitës dhe të kategorisë së dytë në Turqi, përgjatë pesë viteve të fundit.
Pezullimi ua ndalon personave të dënuar ushtrimin e çdo detyre zyrtare në futboll për një periudhë prej 45 ditësh.
Në mesin e tyre është edhe presidenti i Trabzonsporit, Ertugrul Dogan.
Ndërkohë, procedurat disiplinore ndaj 301 zyrtarëve të tjerë janë mbyllur, pasi bordi disiplinor ka vlerësuar se nuk kishte prova të mjaftueshme për të vërtetuar shkeljet e dyshuara në lidhje me bastet.
Ky vendim vjen në kuadër të masave më të gjera të Federatës Turke të Futbollit për të luftuar shkeljet që lidhen me integritetin e garave sportive.
Më herët, kjo fushatë kishte rezultuar me pezullimin e 149 gjyqtarëve dhe mbi 1.000 futbollistëve në ligat vendore./Telegrafi/
