Franca do të ndalojë gjatë ditëve në vijim, veçanërisht të shtunën, demonstratat që nuk organizohen nga sindikatat, pas trazirave të fundit në vend. Lajmi u bë i ditur nga presidenti francez, Emmanuel Macron, pas një mbledhjeje të Këshillit të Sigurisë.
Macron deklaroi se prefektët do të ndalojnë kërkesat për organizimin e protestave që paraqiten nga grupe pa legjitimitet për të thirrur tubime të tilla. Ndërkohë, kërkesat e paraqitura nga sindikatat do të shqyrtohen nga autoritetet, të cilat mund të propozojnë itinerare alternative për zhvillimin e demonstratave.
Sipas presidentit francez, kur protestat nuk organizohen nga sindikatat, autoritetet do të ndërhyjnë për t’i ndaluar ato, aty ku është e mundur, me synimin për të rikthyer qetësinë dhe për të mbrojtur bizneset dhe ndërtesat publike.
Kreu i shtetit pranoi gjithashtu se gjatë protestave mbarëkombëtare të fundjavës së kaluar, të nxitura nga pakënaqësitë për koston e jetesës dhe çmimet e karburanteve, pati mangësi në parashikimin e situatës dhe elementë të papritur.
Ai bëri të ditur se prefektët kanë marrë tashmë masa në zonat ku është vlerësuar e nevojshme, përfshirë ndalimin e tubimeve dhe demonstratave, si dhe vendosjen e shtetrrethimeve. Sipas Macron, ngjarjet e natës së kaluar kanë treguar edhe një herë rëndësinë e këtyre masave.
Presidenti njoftoi gjithashtu se hetimet për trazirat do të thellohen, duke pretenduar se grupe të organizuara të së majtës ekstreme kanë kryer akte politike dhe veprime kryengritëse me synimin për të rrëzuar Republikën.
Në përfundim, Macron bëri të ditur se të premten do të mbledhë Këshillin e Mbrojtjes për të vlerësuar përgatitjet e autoriteteve dhe për të marrë vendime të tjera, në varësi të zhvillimeve të situatës.
