Prej 25 vitesh nuk ka asnjë informacion të sigurt për fatin e Rajmonda Kotorrit, vajzës nga Gramshi që u zhduk në moshë të mitur. Familja e saj nuk e ka humbur shpresën dhe sot kërkon të mësojë të vërtetën, ndërsa motra e saj, Laureta Kotorri, ka përsëritur apelin publik për të zbuluar se çfarë ka ndodhur me të.
Rajmonda ishte vetëm 16 vjeçe kur familjarët e panë për herë të fundit, në vitin 1999, ndërsa ndiqte shkollën pranë Gramshit. Sipas rrëfimit të motrës së saj për median italiane Fanpage.it, pas zhdukjes familja mësoi se ajo mund të kishte krijuar një lidhje me një burrë shqiptar, rreth 15 vjet më të madh se ajo, i cili ishte larguar drejt Italisë.
Kontakti i fundit telefonik me familjen daton në qershor të vitit 2001. Gjatë asaj bisede, Rajmonda kishte treguar se jetonte në Itali me këtë person dhe punonte si bariste në një lokal në Milano, me synimin për të kursyer para. Pas kësaj telefonate, familjarët nuk arritën të siguronin më kontakte të tjera me të.
Dyshimet për shfrytëzim dhe zhdukja pa gjurmë
Në vitin 2003, familja mësoi nga një punonjës i policisë italiane se Rajmonda dyshohej se shfrytëzohej për prostitucion nga personi me të cilin shoqërohej.
Po atë vit, një grua që ishte prezantuar si bashkëjetuese e saj në Lodi raportoi zhdukjen, duke deklaruar se Rajmonda nuk ishte parë më pas një nate që kishte kaluar me një klient.
Tre vjet më vonë, në vitin 2006, mbërriti një sinjalizim sipas të cilit ajo mund të ishte parë në Romë. Megjithatë, ky informacion nuk u konfirmua dhe që prej asaj kohe nuk ka pasur të dhëna të sigurta për vendndodhjen e saj.
Apeli i motrës: Duam vetëm të dimë çfarë ka ndodhur
Pas kaq shumë vitesh pasigurie, Laureta Kotorri kërkon që historia e motrës së saj të mos harrohet. Familja thotë se nuk kërkon të ndërhyjë në jetën e Rajmondës, nëse ajo është gjallë, por vetëm të marrë një përgjigje për fatin e saj.
“Familja ime dhe unë nuk e kemi humbur kurrë shpresën për ta gjetur Rajmondën. Ajo është e lirë të bëjë jetën e saj, ne duam vetëm të dimë se është gjallë. Nëse nuk është kështu, do të pranojmë çdo skenar. Por duam të dimë çfarë ka ndodhur me të. Nëse ka vdekur, duam të kemi një varr ku të mund të qajmë”, është shprehur Laureta.
Familja ka rinisur apelin përmes shoqatës Penelope Lombardia, e cila mbështet familjarët e personave të zhdukur në Itali. Shpresa është që dikush që mund ta ketë parë, takuar apo të ketë pasur kontakt me Rajmondën gjatë këtyre viteve të japë një informacion që mund të ndihmojë në zbardhjen e misterit.
“Kushdo duhet ta ketë parë ose takuar gjatë gjithë këtyre viteve. Dikush duhet të dijë diçka. Jemi plot shpresë”, përfundon motra e saj.
Pas një çerek shekulli pa përgjigje, familja Kotorri vazhdon të kërkojë një shenjë për Rajmondën, me shpresën se një informacion i vogël mund të ndihmojë më në fund për të zbuluar të vërtetën mbi fatin e saj.