Kancelari gjerman, Friedrich Merz, ka bërë thirrje për dialog, stabilitet politik dhe vijimin e reformave në Ballkanin Perëndimor, duke theksuar se dhuna dhe polarizimi nuk mund të jenë zgjidhje për sfidat me të cilat përballen vendet e rajonit dhe Evropa.
Gjatë fjalës së tij në Samitin e Procesit të Berlinit, që po zhvillohet në Mal të Zi, Merz mori pjesë në seancën plenare me temë “Një rajon në lëvizje: Ballkani Perëndimor duke formësuar të ardhmen e përbashkët të Evropës”.
Kreu i qeverisë gjermane u ndal te protestat në vende të ndryshme të Evropës dhe të Ballkanit Perëndimor, duke nënvizuar se ato përcjellin mesazhin se procesi i zgjerimit të Bashkimit Evropian duhet të vijojë dhe të sjellë përfitime konkrete për qytetarët.
“Të gjithë i shohim protestat në mbarë rajonin, në mbarë Evropën dhe në vendet tona. Dhe këto protesta japin një mesazh të qartë: duhet të vazhdojmë me procesin e zgjerimit dhe duhet të sigurohemi që qytetarët tanë të përfitojnë prej tij”, deklaroi Merz.
Kancelari gjerman theksoi se, pavarësisht situatave politike dhe tensioneve që mund të shoqërojnë protestat, dhuna nuk duhet të përdoret në asnjë rrethanë si alternativë.
“Më lejoni të jem i qartë për dy çështje. Së pari, kur përballemi me protesta në BE apo këtu në rajon, dhuna nuk duhet të jetë kurrë një alternativë nga asnjëra palë. Së dyti, për përmbushjen e gjithë këtyre është veçanërisht e vështirë nëse e kaluara na mban tërësisht peng”, u shpreh ai.
Merz nënvizoi gjithashtu se retorika përçarëse dhe polarizimi politik pengojnë krijimin e një Evrope më të sigurt, më të lirë dhe më të begatë.
“Retorika përçarëse apo polarizimi në rritje nuk do të na çojnë në një Evropë më të sigurt, më të lirë dhe më të begatë. Dhe historia nuk do t’i gjykojë me dashamirësi ata që përçajnë në këto kohë të ndërlikuara”, përfundoi kancelari gjerman.
Deklaratat e Merz në Samitin e Procesit të Berlinit vënë në fokus rëndësinë e dialogut politik, shmangien e përshkallëzimit të konflikteve dhe vazhdimin e procesit të integrimit evropian të vendeve të Ballkanit Perëndimor.