Kurti poston takimi me Merz në Mal të Zi: Askush nuk mund ta mbajë peng rajonin! Investimet gjermane në Kosovë arrijnë 1,5 miliardë euro

Kryeministri i Kosovës, Albin Kurti, ka shfrytëzuar Samitin e 13-të të Procesit të Berlinit në Mal të Zi për të vënë në fokus bashkëpunimin rajonal, zbatimin e marrëveshjeve mes vendeve të Ballkanit Perëndimor dhe forcimin e lidhjeve ekonomike me Gjermaninë.

Në një postim pas takimit me kancelarin gjerman Friedrich Merz, Kurti bëri të ditur se ka marrë urimet e tij për mandatin e ri qeverisës. Takimi vjen në një moment kur Bundestagu ka vendosur që trupat gjermane të vazhdojnë qëndrimin në Kosovë, në kuadër të misionit paqeruajtës të KFOR-it.

Duke rikujtuar nisjen e Procesit të Berlinit në vitin 2014, Kurti vlerësoi rolin e Gjermanisë në krijimin e një platforme ku gjashtë vendet e Ballkanit Perëndimor trajtohen në mënyrë të barabartë dhe bashkëpunojnë për çështje me interes të përbashkët.

Kryeministri kosovar veçoi marrëveshjet për lëvizjen me letërnjoftime dhe njohjen e diplomave, të cilat, sipas tij, Kosova i ka zbatuar tërësisht. Ai u bëri thirrje edhe vendeve të tjera që të përmbushin angazhimet e tyre, duke përcjellë një mesazh të drejtpërdrejtë për bashkëpunimin rajonal.

“Të gjithë duhet të bëjnë të njëjtën gjë, sepse askush nuk mund ta mbajë peng rajonin”, shkroi Kurti.

Një tjetër pikë e rëndësishme e mesazhit të tij ishte bashkëpunimi ekonomik me Gjermaninë. Sipas shifrave të bëra publike nga kryeministri, investimet e drejtpërdrejta gjermane në Kosovë arrijnë në rreth 1,5 miliardë euro, nga të cilat 62% janë realizuar vetëm gjatë pesë viteve të fundit.

Kurti theksoi se mundësitë për investime dhe partneritet mbeten të mëdha në sektorët e industrisë, energjisë, transportit, teknologjisë së informacionit dhe komunikimit, si dhe arsimit profesional.

Në vijim të këtij bashkëpunimi, Prishtina do të presë javën e ardhshme Forumin e tretë Ekonomik Gjermano-Kosovar, një tjetër mundësi për të nxitur lidhjet mes bizneseve dhe investitorëve të dy vendeve.

Në përfundim të mesazhit të tij, Kurti riafirmoi orientimin evropian të Kosovës, duke e cilësuar Gjermaninë si pjesë të së ardhmes evropiane të vendit dhe duke falënderuar kancelarin Friedrich Merz.