Kreu i Grupit Parlamentar të Partisë Demokratike, Gazment Bardhi, ka reaguar ashpër ndaj Taulant Ballës, duke e akuzuar për presion ndaj prokurorit të Tiranës, Arbër Berexha.
Në një deklaratë publike, Bardhi e cilëson reagimin e Ballës si sulm ndaj prokurorisë dhe pretendon se deputeti socialist po përpiqet të ndikojë në mënyrën se si duhet të veprojë drejtësia.
Sipas Bardhit, vendimet e gjykatave gjatë 10 ditëve të fundit, përmes të cilave janë vlerësuar si të paligjshme disa arrestime të kryera nga Policia e Shtetit, tregojnë se institucionet e drejtësisë duhet të veprojnë pa presion politik.
Ai deklaron se vetëm gjatë ditës së sotme, nga 38 personat që dolën para gjykatës për caktimin e masës së sigurisë, të 38 janë liruar, ndërsa në 33 raste arrestimet janë vlerësuar si të paligjshme.
Bardhi rikthen gjithashtu akuzat ndaj Ballës për ndërhyrje të pretenduar në prokurori lidhur me heqjen e sekuestros ndaj pronave që, sipas tij, lidhen me Suel Çelën, kreun e organizatës kriminale në Elbasan. Ai thotë se këto pretendime i ka ngritur më herët bazuar në përgjimet e SKY ECC.
Një pjesë të reagimit, kreu i grupit parlamentar të PD-së ia kushton edhe çështjes së të miturve dhe studentëve të arrestuar gjatë protestave, duke akuzuar mazhorancën për standarde të dyfishta në raport me drejtësinë.
Sipas tij, ndërsa për të rinjtë kërkohen masa të rënda, për zyrtarët e pushtetit kërkohet trajtim më i butë. Në këtë kontekst, ai përmend edhe Belinda Ballukun, ndaj së cilës pretendon se janë ngritur akuza për 15 vepra penale.
REAGIM I KRYETARIT TË GRUPIT PARLAMENTAR TË PD, GAZMENT BARDHI
Dënoj me forcë sulmin e Taulant Ballës, avokatit të Suel Çelës, ndaj prokurorit të Tiranës, Arbër Berexha.
Gjatë këtyre 10 ditëve, prokurorë dhe gjyqtarë të Republikës kanë treguar se ligji ka kufij të qartë dhe se askush nuk mund të qëndrojë mbi të. Vendimet e tyre, përmes të cilave dhjetëra arrestime të kryera nga Policia e Shtetit janë vlerësuar si të paligjshme, dëshmojnë se përgjegjshmëria institucionale duhet vlerësuar dhe respektuar, jo sulmuar dhe intimiduar.
Vetëm sot, nga 38 personat që dolën para gjykatës për caktimin e masës së sigurisë, të 38 janë liruar, ndërkohë që në 33 raste gjykata i ka vlerësuar arrestimet si të paligjshme.
Është thellësisht shqetësues fakti që një person, të cilin, bazuar në përgjimet e SKY ECC, e kam akuzuar publikisht për ndërhyrje në Prokurori me qëllim ndikimin në vendimmarrjen për heqjen e sekuestros ndaj pronave të lidhura me kreun e organizatës kriminale të Elbasanit, Suel Çela, sot i lejon vetes t’i tregojë një prokurori të Republikës se si duhet të veprojë. Madje, edhe se si duhet të mbajë në burg, pa prova dhe pa bazë ligjore, fëmijë e studentë.
Në vend që Taulant Balla të japë llogari para Prokurorisë, ai gjen kurajën t’i kërkojë llogari asaj. Çfarë paradoksi!
Por këtu zbulohet edhe standardi i dyfishtë i mazhorancës: për fëmijët dhe studentët kërkohet burg, pa prova dhe pa bazë ligjore, ndërsa kur bëhet fjalë për Belinda Ballukun, ndaj së cilës janë ngritur akuza për 15 vepra të rënda penale, paraburgimi shpallet papritur një shqetësim madhor. Për qytetarët kërkohet ashpërsi, ndërsa për të pushtetshmit kërkohet lehtësi. Për të rinjtë kërkohet burg, ndërsa për njerëzit e pushtetit kërkohet liri.
Drejtësia nuk mund të jetë e rreptë me të dobëtit dhe e butë me të fortët. Ligji nuk mund të interpretohet sipas interesave politike, as prokurorët dhe gjyqtarët nuk mund të bëhen objekt sulmesh sa herë që vendimet e tyre nuk u pëlqejnë njerëzve të pushtetit.
Mjeranë! Koha kur qytetarët mund të frikësoheshin me kërcënimin e burgut po merr fund. Asnjë sulm politik nuk mund ta zëvendësojë ligjin dhe asnjë presion nuk mund ta kthejë drejtësinë në pronë të pushtetit. Harrojeni!
