Një tërmet i fuqishëm me magnitudë 7.0 ka goditur Tibetin, në Kinën perëndimore, duke shkaktuar shqetësim për pasojat e mundshme në zonën e prekur. Pas lëkundjeve janë publikuar pamjet e para, ndërsa deri më tani nuk ka të dhëna të konfirmuara për viktima, të plagosur apo dëme materiale.
Sipas Shërbimit Gjeologjik të Shteteve të Bashkuara (USGS), tërmeti u regjistrua në orën 22:30, sipas kohës lokale. Epiqendra ndodhej rreth 183 kilometra në lindje-verilindje të qytetit Nagqu, në Rajonin Autonom të Tibetit.
Sipas CNN, pamjet e para nga zona pas tërmetit kanë nisur të publikohen, por shkalla e dëmeve dhe ndikimi i lëkundjeve ende nuk janë përcaktuar.
Kina është një nga vendet që përballet shpesh me tërmete të fuqishme, veçanërisht në pjesën jugperëndimore, ku përplasja e pllakave tektonike indiane dhe euroaziatike ka krijuar Himalajet dhe pllajën e Tibetit. Kjo veprimtari tektonike e bën rajonin veçanërisht të ndjeshëm ndaj lëkundjeve sizmike.
UPDATE: Footage captures shaking from a reported M7.0 earthquake in Baqing County, Nagqu, Tibet. China – Sismo – Terremoto – Temblor https://t.co/tyNYJmUjwx
— GeoTechWar (@geotechwar) October 22, 2026
Në janar të vitit 2024, një tërmet me magnitudë 7.1 goditi një zonë malore të largët në rajonin Xinjiang, duke shkaktuar tre viktima dhe dhjetëra të plagosur. Ndërsa në dhjetor të vitit 2023, më shumë se 100 persona humbën jetën nga një tërmet në qarkun Jishishan, në provincën Gansu.
Autoritetet dhe ekipet e emergjencës pritet të vlerësojnë situatën në zonën e goditur, ndërsa informacionet për pasojat e tërmetit mbeten ende të kufizuara.