Pothuajse i gjithë Tajvani u paralizua të premten për shkak të afrimit të tajfunit Champi, i cili pritet të sjellë erëra të fuqishme dhe reshje intensive shiu. Megjithëse stuhia po dobësohet, autoritetet paralajmërojnë se ajo mund të godasë drejtpërdrejt ishullin.
Sipas Administratës Qendrore të Motit të Tajvanit (CWA), Champi, i cili në kulmin e tij u klasifikua si një supertajfun dhe një nga stuhitë më të fuqishme në Paqësor këtë vit, vijonte të regjistronte erëra me shpejtësi rreth 191 kilometra në orë pranë qendrës së tij.
Në momentin e raportimit, stuhia ndodhej rreth 320 kilometra në lindje të skajit jugor të Tajvanit. Sipas parashikimeve meteorologjike, ajo pritet të kalojë pranë pjesës verilindore të ishullit, përpara se të kthehet drejt veriut, në drejtim të bregdetit kinez, dhe më pas të zhvendoset drejt Japonisë jugore.
Bilanci paraprak i situatës në Tajvan flet për një viktimë dhe 94 persona të plagosur. Ndërkohë, qeveria ka bërë të ditur se rreth 1,300 persona janë evakuuar nga zonat malore, për shkak të rrezikut nga reshjet e dendura dhe rrëshqitjet e mundshme të dheut.
Meteorologu i CWA-së, Liu Pei-teng, deklaroi për agjencinë Reuters se nuk mund të përjashtohet mundësia që tajfuni të dalë në tokë, nëse ndryshon trajektoren ose ngadalëson lëvizjen gjatë afrimit me ishullin.
Sipas tij, një nga rreziqet kryesore është përmasa e madhe e sistemit të stuhisë. Liu paralajmëroi se, nëse Champi ngadalësohet, Tajvani mund të përballet me erëra të forta për një periudhë më të gjatë kohore.
Autoritetet në qytetet bregdetare kanë dërguar paralajmërime urgjente në telefonat celularë të banorëve, duke i njoftuar për erëra që mund të tejkalojnë 150 kilometra në orë dhe duke u kërkuar të strehohen menjëherë. Në zonat malore veriore, përfshirë rajonin përreth kryeqytetit Taipei, parashikohet që reshjet e shiut të arrijnë deri në afro një metër.
Autoritetet tajvaneze vijojnë të monitorojnë situatën, ndërsa u kanë bërë thirrje qytetarëve të respektojnë paralajmërimet dhe të shmangin zonat e rrezikuara nga përmbytjet, erërat e forta dhe rrëshqitjet e dheut.
The post Tajfuni kërcënon Tajvanin, një i vdekur dhe 94 të plagosur appeared first on Euronews Albania.
Burimi: Botë
