Vdes ylli i filmave “Alien” dhe “Top Gun”, Tom Skerrit ndërron jetë në moshën 93-vjeçare

Lajmi u konfirmua nga publicisti i tij për revistën “Variety”, i cili bëri të ditur se aktori ndërroi jetë nga shkaqe natyrore.

Në një deklaratë të familjes, të publikuar nga revista “People”, Skerritt kujtohet jo vetëm për karrierën e tij të gjatë dhe të suksesshme në aktrim, por edhe për humorin, mençurinë, bujarinë dhe dashurinë që u dhuroi njerëzve të afërt.

Lajmi për vdekjen e aktorit ka prekur kolegët e tij, të cilët kanë ndarë mesazhe homazhi në kujtim të tij. Julia Roberts, me të cilën Skerritt luajti në filmin “Steel Magnolias”, e përshkroi atë si “një dritë të shkëlqyeshme dhe një njeri të butë”.

Edhe aktorja Cathy Baker, bashkëprotagoniste e tij në serialin “Picket Fences”, shprehu dhimbjen për humbjen e aktorit, të cilin e cilësoi si një mik të dashur dhe partner të jashtëzakonshëm në ekran. Ajo theksoi se kishte mësuar shumë prej tij dhe se bashkëpunimi me të kishte qenë një përvojë e veçantë.
Një karrierë mbi 60-vjeçare në film dhe televizion

Tom Skerritt ndërtoi një karrierë që zgjati më shumë se gjashtë dekada, duke interpretuar në mbi 170 produksione për ekranin e madh dhe atë të vogël. Gjatë kësaj periudhe, ai fitoi një çmim Emmy dhe u nominua për çmimet Golden Globe dhe Screen Actors Guild.

Pas katër vitesh shërbimi në Forcat Ajrore të Shteteve të Bashkuara, Skerritt debutoi në kinema në vitin 1962 me filmin e luftës “War Hunt”, ku luajti përkrah Robert Redford dhe Sydney Pollack.

Suksesi i tij nisi të merrte përmasa më të mëdha në vitin 1970, me rolin në filmin satirik “M*A*S*H” të regjisorit Robert Altman. Filmi pati sukses të madh në kinema dhe u nominua për çmimin Oscar në kategorinë e filmit më të mirë.

Gjatë viteve 1970, aktori u shfaq në disa produksione të njohura, mes tyre “Harold and Maude”, “Thieves Like Us”, “Big Bad Mama” dhe “The Turning Point”.

Një nga rolet më të spikatura të karrierës së tij ishte ai i kapitenit Dallas në filmin fantastiko-shkencor “Alien”, të regjisorit Ridley Scott, i publikuar në vitin 1979. Filmi u kthye në një vepër klasike të zhanrit dhe mbetet ndër produksionet më të njohura ku interpretoi aktori.

Në vitin 1986, Skerritt luajti në filmin “Top Gun”, përkrah Tom Cruise, në rolin e komandantit Mike “Viper” Metcalf, duke fituar një tjetër brez admiruesish.

Në vitet 1990, aktori u shfaq në filma si “A River Runs Through It”, “Contact”, “Poison Ivy” dhe “The Other Sister”. Një tjetër moment i rëndësishëm ishte roli i tij në serialin “Picket Fences”, për të cilin fitoi çmimin Emmy. Seriali u transmetua për katër sezone dhe u vlerësua për trajtimin e temave familjare dhe shoqërore.

Në vitet 2000, ai vijoi të ishte aktiv në film dhe televizion, duke marrë pjesë në produksione si “Tears of the Sun” dhe “Whiteout”, si dhe në serialet “Will & Grace”, “The West Wing” dhe “Brothers & Sisters”.

Roli i tij i fundit në film ishte në dramën western “Broke”, të vitit 2025, ku luajti përkrah Dennis Quaid.

Përtej aktrimit, Skerritt u angazhua edhe në nisma sociale. Në vitin 2012, ai bashkëthemeloi “Red Badge Project”, një iniciativë që synonte të ndihmonte veteranët ushtarakë të përballonin traumën psikologjike pas shërbimit, përmes rrëfimit të përvojave të tyre.

Në një intervistë të vitit 2021, aktori e përshkroi veten si një njeri me fat dhe theksoi se forca matet nga mënyra se si një person përballet me dobësitë e veta.

Me largimin e Tom Skerritt, kinemaja amerikane humbet një aktor me një karrierë të gjatë dhe të larmishme, i cili la gjurmë në disa prej filmave dhe serialeve më të njohura të disa brezave.

Top Channel