Harry Kane është mes kandidatëve për fitimin e Topit të Artë, por sulmuesi anglez pranon se pritja për të mësuar emrin e fituesit po shkakton tension edhe në familjen e tij. Ylli i Bayern Munich nuk e fsheh dëshirën për ta zbuluar rezultatin sa më shpejt.
Ceremonia e ndarjes së Topit të Artë po afron dhe gara për çmimin prestigjioz mbetet e hapur. Pas një viti me paraqitje të shumta të nivelit të lartë, disa futbollistë pretendojnë trofeun individual, mes tyre edhe Harry Kane, sulmuesi i Bayern Munich dhe përfaqësueses së Anglisë.
Në një intervistë të raportuar nga gazeta britanike The Guardian, Kane ka rrëfyer se pritja po shoqërohet me emocione të forta, veçanërisht brenda familjes së tij.
“Bashkëshortja ime do të preferonte ta dinte rezultatin që tani, ndërsa familja ime është shumë nervoze”, deklaroi sulmuesi anglez.
Kane pranoi se e kupton vendimin e organizatorëve për të mos zbuluar paraprakisht fituesin, në mënyrë që ceremonia të ruajë interesin dhe të gjithë yjet të kenë mundësinë të marrin pjesë.
Megjithatë, ai nuk e fshehu dëshirën për të mos pritur deri në fund të mbrëmjes për të mësuar rezultatin.
“Do të doja ta dija fituesin që tani, thjesht që të mund ta ndiqja ceremoninë pa pasur nevojë të prisja gjithë natën. Por ky është vendimi i tyre dhe unë nuk mund ta kontrolloj”, u shpreh Kane.