Argjentina kërkon pasardhësin e Messit, kujt do t’i besohet numri 10?

Nico Paz po shihet gjithnjë e më shumë si një kandidat për ta marrë fanellën ikonike me numrin 10 të Argjentinës, pas përfundimit të epokës së Lionel Messit. Talenti argjentinas, i cili po shkëlqen me Comon në Itali, po bind me paraqitjet e tij dhe po dëshmon se mund të bëhet një nga lojtarët kryesorë të së ardhmes së kombëtares.

Paz ka shënuar pesë gola në 17 paraqitje me Argjentinën, ndërsa në nivel klubesh ka pasur ndikim të madh te Como. Paraqitjet e tij kanë tërhequr vëmendjen, veçanërisht për aftësinë për të krijuar raste dhe për të kontribuar në fazën sulmuese.

Megjithatë, të marrësh numrin 10 të Argjentinës nuk është një detyrë e lehtë. Kjo fanellë është mbajtur nga legjenda si Diego Maradona dhe Lionel Messi, të cilët fituan Kupën e Botës dhe lanë pas një trashëgimi të jashtëzakonshme.

Në të kaluarën, numrin 10 e kanë veshur edhe Marcelo Gallardo, Ariel Ortega, Juan Roman Riquelme dhe Andres D’Alessandro. Madje, për shkak të mënyrës se si caktoheshin numrat në atë kohë, fanella me numrin 10 i kishte takuar edhe portierit Nacho Gonzalez.

Nico Paz, i lindur në Tenerife të Spanjës, është djali i ish-futbollistit të Argjentinës, Pablo Paz, i cili e përfaqësoi kombëtaren në Kupën e Botës 1998. Ai u zhvillua në akademinë e Real Madridit përpara se të vazhdonte karrierën te Como, ku ka fituar besimin e trajnerit Cesc Fabregas.

Edhe pse stili i tij i lojës ndryshon nga ai i Messit dhe Maradonës, Paz po dëshmon se ka cilësitë për të marrë përgjegjësi të mëdha. Megjithatë, nëse do ta veshë fanellën me numrin 10 të Argjentinës, mbetet një vendim që do të varet nga përzgjedhësi Lionel Scaloni dhe planet e tij për të ardhmen e kombëtares.