Një shpërthim i fuqishëm në një minierë në veri të Turqisë ka shkaktuar vdekjen e të paktën dy punëtorëve dhe plagosjen e pesë të tjerëve mëngjesin e kësaj të premteje, 23 tetor. Një tjetër punëtor raportohet se ka mbetur i bllokuar brenda minierës, ndërsa ekipet e shpëtimit po zhvillojnë një operacion për nxjerrjen e tij. Ngjarja e rëndë ka ndodhur në një minierë pranë qytetit Kilimli, në provincën Zonguldak, përgjatë bregdetit të Detit të Zi.
Guvernatori i Zonguldakut, Osman Hacibektasoglu, konfirmoi bilancin paraprak të viktimave dhe të plagosurve, duke bërë të ditur se dy prej të lënduarve ndodhen në gjendje kritike për jetën. Sipas autoriteteve lokale, njëri prej punëtorëve të plagosur rëndë po transferohet drejt Ankarasë për trajtim më të specializuar mjekësor. Menjëherë pas shpërthimit, në vendngjarje kanë mbërritur forca të shumta zjarrfikëse, ambulanca, ekipe të Autoritetit të Menaxhimit të Fatkeqësive dhe Emergjencave, si dhe specialistë të kërkim-shpëtimit.
Operacioni është përqendruar te gjetja dhe nxjerrja e punëtorit që dyshohet se ka mbetur i bllokuar në brendësi të minierës. Ekipet e emergjencës po punojnë për të arritur sa më shpejt te vendndodhja e tij.
Ende nuk janë bërë të ditura shkaqet e shpërthimit, ndërsa autoritetet pritet të nisin hetimet për të përcaktuar rrethanat e aksidentit. Bilanci i viktimave mbetet paraprak, ndërsa gjendja e rëndë e dy të plagosurve dhe operacioni për shpëtimin e punëtorit të bllokuar e mbajnë situatën kritike.