Ukraina vazhdon të hasë probleme me rrjetin Starlink, bëjnë të ditur burime nga Ministria e Mbrojtjes e Kievit, dhe kjo ndodh pavarësisht deklaratës së Donald Trump se kufizimet në lidhjen satelitore janë hequr nga Elon Musk. Burimet i thanë BBC-së se janë regjistruar raste kur dronët humbasin lidhjen në shpejtësi prej 161 km/h, gjë që pengon operacionet ushtarake. Presidenti amerikan kishte mohuar se e kishte udhëzuar miliarderin e teknologjisë që të kufizonte lidhjen në "Starshield", versionin e Starlink të dedikuar për përdorim ushtarak, por të enjten deklaroi se Musk "e ka rikthyer atë siç ishte". Më herët, Musk kishte deklaruar se nuk ishte ai shkaktari i ngadalësimit të shërbimit, i cili ndikoi në aftësinë e Ukrainës për të përdorur dronë sulmues dhe për të koordinuar operacionet mbrojtëse. Burimet nga Ministria e Mbrojtjes e Ukrainës bënë të ditur se ushtria po monitoron vazhdimisht performancën e rrjeteve Starlink dhe Starshield. Ato shtuan se "aktualisht nuk ka asnjë konfirmim që këto kufizime janë hequr". Javën e kaluar, Kievi njoftoi se shpejtësia e lidhjes me satelitët në orbitën e ulët tokësore ishte kufizuar, duke ndikuar në shpejtësinë me të cilën mund të lëviznin dronët. Sipas zyrtarëve, çdo dron që lëvizte me shpejtësi më të madhe se 160 km në orë humbiste lidhjen. Pak më vonë, Musk deklaroi se Starshield kontrollohet nga ushtria amerikane, duke lënë të kuptohet se pas këtyre problemeve mund të qëndrojë Pentagoni. Shtëpia e Bardhë, nga ana e saj, ka mohuar vazhdimisht se ka vendosur qëllimisht kufizime në rrjetin që përdoret në Ukrainë. Të enjten, kur u pyet për raportimet lidhur me këtë çështje, Trump nuk pranoi të tregonte nëse e kishte telefonuar Musk-un për t'i kërkuar heqjen e kufizimeve, por theksoi: "E rëndësishmja është se ai e riktheu atë siç ishte".