Forcat Aleate demonstrojnë gatishmërinë detare në brigjet e Shqipërisë

Kapacitetet detare, ajrore dhe amfibe të forcave aleate ishin në qendër të vëmendjes në bordin e anijes turke TCG ANADOLU dhe në bregdetin shqiptar, gjatë aktivitetit Neptune Strike 26-4, më 19 tetor 2026, duke demonstruar bashkëpunimin dhe gatishmërinë që përbëjnë bazën e mbrojtjes kolektive të NATO-s.

Në aktivitet morën pjesë personalitete të shquara, përfshirë drejtues të mbrojtjes dhe të forcave të armatosura nga Shqipëria dhe Turqia, si dhe atashe ushtarakë të mbrojtjes nga vendet anëtare të NATO-s: Bullgaria, Republika Çeke, Gjermania, Greqia dhe Polonia. Ata ndoqën demonstrimet që shfaqën aftësinë e forcave aleate për të vepruar së bashku në det, në ajër dhe në tokë.

“TCG Anadolu është një anije shumëfunksionale për sulme amfibe dhe një nga platformat më të afta të Marinës Ushtarake Turke. Ajo pasqyron angazhimin e Turqisë ndaj mbrojtjes kolektive të Aleancës dhe kontributin tonë në krahun e saj juglindor, aty ku takohen Mesdheu, Egjeu dhe Deti i Zi”, deklaroi kundëradmirali Mevlut Savash Bilican, komandant i grupit të detyrës në bordin e TCG ANADOLU.

Programi përfshinte një zbarkim amfib në Bazën Detare të Pashalimanit në Shqipëri, operacione fluturimi me helikopterë, demonstrime të zbritjes me litarë nga helikopterët, si dhe ngritje dhe ulje të mjeteve ajrore pa pilot TB3 nga kuverta e fluturimit e anijes TCG ANADOLU. Së bashku, këto aktivitete nxorën në pah koordinimin e nevojshëm për të integruar kapacitete të ndryshme në një forcë detare të bashkërenduar.

Një ditë më parë, forcat shqiptare dhe turke zhvilluan operacione të vizitës, hipjes në bord, kontrollit dhe sekuestrimit (VBSS) në bordin e anijes patrulluese shqiptare të klasit Iliria, ALS Oriku, dhe fregatës turke të pajisur me raketa të drejtuara, TCG Gaziantep. Këto aktivitete krijuan një mundësi tjetër për të praktikuar bashkëpunimin mes dy aleatëve dhe për të forcuar aftësitë që mbështesin sigurinë detare.

Neptune Strike 26-4 është edicioni i katërt dhe i fundit i serisë së aktiviteteve Neptune të NATO-s për vitin 2026. Ky aktivitet i vigjilencës së shtuar bashkon forcat detare, ajrore dhe amfibe të vendeve aleate, me qëllim forcimin e ndërveprueshmërisë, rritjen e gatishmërisë dhe demonstrimin e aftësisë së NATO-s për të integruar kapacitete të avancuara në mbështetje të parandalimit dhe mbrojtjes.

Aktivitetet e zhvilluara në brigjet shqiptare përforcuan një mesazh të qartë: uniteti i Aleatëve dëshmohet përmes forcave që janë në gjendje të veprojnë së bashku në mënyrë efektive. Duke forcuar këtë aftësi, NATO ndihmon në ruajtjen e lirisë së lundrimit dhe të manovrimit, në garantimin e sigurisë së popullsive të vendeve aleate dhe në ruajtjen e një kapaciteti të besueshëm parandalues.

NEPTUNE STRIKE zhvillohet në përputhje me të drejtën ndërkombëtare dhe standardet e njohura ndërkombëtarisht, duke mbështetur angazhimin e NATO-s për mbrojtjen kolektive, stabilitetin rajonal dhe ruajtjen e paqes.