Ndërrimi i orës në vjeshtë, kur akrepat kthehen një orë prapa, u jep shumicës së njerëzve mundësinë të flenë një orë më shumë.
Megjithatë, ndryshimi i ritmit ditor mund të ndikojë përkohësisht te gjumi dhe energjia, ndaj ekspertët këshillojnë disa zakone të thjeshta për t’u përshtatur më shpejt.
Akademia Amerikane e Mjekësisë së Gjumit rekomandon që ora të kthehet prapa para se të shkoni në shtrat, ndërsa zgjimi të vazhdojë në orarin e zakonshëm.
Megjithatë, një orë shtesë gjumi nuk mjafton për të kompensuar mungesën e gjumit të grumbulluar gjatë javëve të mëparshme.
Një rol të rëndësishëm luajnë drita natyrale dhe orari i rregullt. Ekspozimi ndaj dritës së mëngjesit dhe mbajtja e të njëjtave orare për gjumin dhe zgjimin mund ta ndihmojnë trupin të përshtatet me ndryshimin.
Ekspertët këshillojnë gjithashtu shmangien e ekraneve rreth dy orë para gjumit, kufizimin e kafesë pas mesditës dhe uljen e konsumit të alkoolit.
Aktiviteti fizik është i dobishëm, por preferohet të kryhet në mëngjes ose pasdite, jo menjëherë para se të flini.
Meqë pas ndërrimit të orës errësira bie më herët, ditët e para mund të sjellin përgjumje më të shpejtë në mbrëmje.
Megjithatë, rekomandohet të mos zhvendoset ndjeshëm ora e gjumit, në mënyrë që të ruhet ritmi i zakonshëm. /Telegrafi/
