Ukraina dhe Rusia kanë rënë dakord për një armëpushim në qytetin e Oleskit, në rajonin e Hersonit, duke nisur nga 29 tetori, me qëllim mundësimin e dërgimit të ndihmave humanitare dhe evakuimin e civilëve përmes një korridori të sigurt. Lajmi është bërë i ditur nga Shtëpia e Bardhë.
Sipas njoftimit amerikan, pas nismave të Melania Trump, banorët do të kenë mundësinë të zgjedhin nëse dëshirojnë të zhvendosen në zonat e kontrolluara nga Ukraina apo në territoret nën kontrollin rus. Për largimin e tyre parashikohet vënia në dispozicion e mjeteve të transportit dhe ofrimi i ndihmës së nevojshme.
“Të dyja vendet kanë rënë dakord të ndalojnë përkohësisht çdo veprimtari ushtarake në Oleski, për të mundësuar hyrjen e ndihmave humanitare dhe përgatitjen e evakuimit të civilëve përmes një korridori të përcaktuar si të sigurt”, thuhet në deklaratën e Shtëpisë së Bardhë.
Qyteti i Oleskit, në rajonin e Hersonit, ndodhet nën pushtimin rus që prej vitit 2022, pas nisjes së pushtimit rus të Ukrainës.
Qyteti u godit rëndë nga shkatërrimi i digës hidroelektrike të Kahovkës në vitin 2023, i cili shkaktoi përmbytje shkatërruese dhe dëme të mëdha në infrastrukturën jetike.
Situata u përkeqësua më tej gjatë vjeshtës së këtij viti, pasi qyteti u përball me izolim gjithnjë e më të madh.
Banorët po përballen me mungesa të rënda të ushqimeve dhe ilaçeve, ndërprerje të energjisë elektrike dhe qasje tejet të kufizuar në shërbimet mjekësore. Ndërkohë, sulmet e vazhdueshme me dronë e kanë bërë jashtëzakonisht të rrezikshme edhe përpjekjen për t’u larguar nga zona.
Sipas vlerësimeve, rreth 6 mijë civilë mund të ndodhen ende në Oleski dhe zonat përreth, mes tyre deri në 200 fëmijë.
Marrëveshja për armëpushimin synon të krijojë kushtet për kalim të sigurt, në mënyrë që ndihmat humanitare të mbërrijnë te banorët e bllokuar dhe të mund të largohen të gjithë ata që dëshirojnë të evakuohen.
