Presidentja e Kosovës, Justina Shiroka Pula, është pritur në takim nga homologu i saj hungarez, András Baka, me të cilin ka diskutuar për marrëdhëniet dypalëshe, integrimin evropian të Kosovës, bashkëpunimin ekonomik dhe çështjet e sigurisë në rajon.
Sipas njoftimit të Presidencës, Shiroka Pula vlerësoi marrëdhëniet ndërmjet Kosovës dhe Hungarisë, duke rikujtuar se Hungaria ishte ndër vendet e para që e njohu pavarësinë e Kosovës.
Ajo shprehu interesimin për thellimin e mëtejshëm të bashkëpunimit ndërmjet dy shteteve, me theks të veçantë në fushat e ekonomisë, arsimit dhe mbrojtjes.
Gjatë takimit u diskutua edhe për procesin e integrimit evropian të Kosovës. Me këtë rast, Shiroka Pula theksoi se anëtarësimi në Bashkimin Evropian mbetet synim strategjik i vendit, ndërsa kërkoi mbështetjen e Hungarisë për avancimin e Kosovës drejt statusit të vendit kandidat dhe për hapat e mëtejshëm të procesit integrues.
Presidentja e Kosovës shprehu gjithashtu mirënjohje për kontributin e Hungarisë në misionin e KFOR-it, duke vlerësuar rëndësinë e tij për ruajtjen e sigurisë dhe stabilitetit në Kosovë.
Në përfundim të takimit, Shiroka Pula e ftoi presidentin hungarez, András Baka, për një vizitë në Kosovë, në një kohë të përshtatshme për të dyja palët.