Zgjedhjet në Serbi, gazetari nga Presheva: Lista studentore mund ta mposhtë Vuçiçin

I ftuar në një lidhje të drejtpërdrejtë nga Presheva në emisionin “Review” me Greta Topjanën, gazetari Valon Arifi, foli për zgjedhjet e së dielës në Serbi, ndërsa tha se, sipas mendimit të tij, kandidatët e përzgjedhur nga studentët mund të mposhtin Aleksandar Vuçiçin dhe të sigurojnë shumicën në Parlament.

“Në Serbi, fillimisht është kërkuar përgjegjësi për ngjarjen në Novi Sad, më pas studentët kanë kërkuar zgjedhje të parakohshme. Nga ana tjetër, ata kanë krijuar listën studentore, me të cilën hyjnë në garë për 250 vende në Kuvend. Është goxha e mundshme dhe, sipas mendimit tim, listat studentore janë favorite. Në to bëjnë pjesë kandidatët që studentët kanë zgjedhur për kryeministër dhe për deputetë në Parlamentin serb. Potencialisht, të dielën ata mund të dalin fitues dhe të marrin drejtimin e qeverisë serbe, duke larguar në njëfarë mënyre nga pushteti regjimin kundër të cilit studentët kanë protestuar prej dy vitesh, ndërsa opozita serbe nuk ia kishte dalë ta bënte këtë në 12 vitet e fundit”, tha Arifi.