Një person është ndaluar nga policia në landin gjerman të Bavarisë, pas zjarrit që përfshiu Kehlsteinhaus-in, rezidencën malore të Adolf Hitlerit, e njohur edhe me emrin “Foleja e Shqiponjës” (Eagle’s Nest).
Qendra e emergjencave në Traunstein mori njoftimin për flakët të premten, në orën 21:15 sipas kohës lokale. Në momentin e mbërritjes, ekipet zjarrfikëse konstatuan se ndërtesa ishte përfshirë nga zjarri.
Të lidhura
None found
Terreni i vështirë malor e bëri më të ndërlikuar ndërhyrjen për shuarjen e flakëve. Sipas autoriteteve policore, zjarri vazhdonte ende gjatë orëve të para të së shtunës, ndërsa në operacion morën pjesë rreth 200 pjesëtarë të shërbimeve të emergjencës.
Autoritetet nuk kanë raportuar persona të lënduar. Ndërkohë, është hapur një hetim penal për të përcaktuar origjinën e zjarrit dhe për të verifikuar nëse i ndaluari lidhet me ngjarjen.
Kehlsteinhaus ndodhet në Alpet bavareze, mbi qytetin e Berchtesgadenit, në pjesën jugore të Gjermanisë. Ndërtesa u përfundua nga nazistët në vitin 1938 dhe Hitleri e përdori si rezidencë malore për takime me bashkëpunëtorët dhe komandantët e tij.
Një vit pas fillimit të Luftës së Dytë Botërore, në vitin 1941, Hitleri dhe drejtues të tjerë nazistë zhvilluan në këtë zonë takime që lidhen me përgatitjet për pushtimin e Bashkimit Sovjetik.
Vendi u përdor edhe si sfond për materiale propagandistike, ku regjimi nazist synonte ta paraqiste Hitlerin si një figurë të afërt me natyrën dhe kafshët.
Pas humbjes së Gjermanisë në vitin 1945, ndërtesa nuk u shkatërrua, ndryshe nga shumë objekte të tjera të lidhura me regjimin nazist.
Sot, “Foleja e Shqiponjës” është një pikë e njohur turistike dhe funksionon edhe si bujtinë malore. Megjithatë, e kaluara e saj mbetet e lidhur me diktaturën naziste dhe krimet e kryera gjatë Luftës së Dytë Botërore.
Në faqen zyrtare të saj, ndërtesa paraqitet gjithashtu si një kujtesë paralajmëruese për pasojat çnjerëzore të diktaturës naziste.
Gjatë Luftës së Dytë Botërore, Adolf Hitleri dhe regjimi i tij ishin përgjegjës për vdekjen e dhjetëra miliona njerëzve, mes tyre edhe miliona hebrenj evropianë të vrarë gjatë Holokaustit.
Hetimi për zjarrin në “Folenë e Shqiponjës” është ende në zhvillim, ndërsa autoritetet gjermane po punojnë për të sqaruar rrethanat e ngjarjes.
