Aktorja Jenna Ortega ka zbuluar planet e saj për të ardhmen, duke lënë të kuptohet se pas përfundimit të serialit të famshëm “Wednesday”, mund të largohet për një periudhë nga projektet televizive.
Gjatë një interviste në podcastin “Happy Sad Confused” të Josh Horowitz, Ortega u shpreh se nuk ka zhvilluar shumë biseda për t’iu bashkuar franshizave të reja, ndërsa dëshiron t’u lërë hapësirë mundësive të tjera në karrierën e saj.
“Besoj se ajo që është e destinuar për mua do të më gjejë vetë. Mendoj se pas ‘Wednesday’, ndoshta do të qëndroj larg televizionit për njëfarë kohe”, u shpreh aktorja. Ortega, e cila ka nisur të aktrojë që në fëmijëri, shpjegoi se ka kaluar shumë vite duke u angazhuar në një serial pas tjetrit dhe se tani dëshiron të provojë gjëra të reja.
Aktorja pritet të rikthehet në rolin e Wednesday Addams në sezonin e tretë të serialit të suksesshëm të Netflix, i cili është planifikuar të publikohet në vitin 2027. Krahas saj, në kast do të jenë sërish Luis Guzmán, Catherine Zeta-Jones dhe Isaac Ordonez, ndërsa Winona Ryder dhe Eva Green do t’i bashkohen kastit.
Seriali, që debutoi në vitin 2022, është kthyer në një nga sukseset e mëdha të Netflix, duke fituar katër çmime Emmy. Sezoni i dytë u publikua në vitin 2025, ndërsa i treti ka përfunduar xhirimet.
Megjithatë, deklarata e aktores nuk nënkupton se ajo do të heqë dorë nga aktrimi, por se mund të kërkojë një pauzë nga televizioni dhe të eksplorojë mundësi të tjera profesionale.
Kjo nuk është hera e parë që Ortega zgjedh të tërhiqet nga një projekt i madh. Aktorja nuk u rikthye në franshizën horror “Scream” për filmin e shtatë, pas pjesëmarrjes në dy filmat e mëparshëm.
Në një intervistë të vitit 2025, ajo shpjegoi se vendimi lidhej me largimin nga projekti të Melissa Barrera-s, por edhe me faktin se regjisorët Tyler Gillett dhe Matt Bettinelli-Olpin nuk do të drejtonin filmin e ri.
Madje, më herët këtë vit, Ortega zbuloi se kishte menduar të hiqte dorë krejtësisht nga aktrimi, përpara se të merrte rolin në serialin “You”, i cili ndihmoi në një moment të rëndësishëm të karrierës së saj.
Tashmë, teksa fansat presin rikthimin e saj si Wednesday Addams, mbetet për t’u parë se cilat projekte do të zgjedhë aktorja pas përfundimit të serialit që e ktheu në një nga emrat më të komentuar të Hollywood-it.
