Protesta e studentëve hyn sot në ditën e 12-të, ndërsa në Tiranë zhvillohet tubimi kombëtar, ku pritet të marrin pjesë studentë nga rrethet, pedagogë, mjekë, artistë dhe përfaqësues të grupeve të ndryshme shoqërore.
Pedagogët pritet të mblidhen në orën 10:00 pranë Universitetit Politeknik, në shenjë solidariteti me studentët dhe kërkesat e tyre.
Edhe Sindikata e Pavarur e Artit, Kulturës dhe Medias së Shqipërisë ka njoftuar se do t’i bashkohet protestës së 24 tetorit. Përmes një thirrjeje publike, ajo u ka bërë apel anëtarëve, artistëve dhe punonjësve të kulturës e medias që të mblidhen në orën 11:00 përpara Kryeministrisë. Sindikata e lidh pjesëmarrjen me përgjegjësinë qytetare për të ardhmen e vendit dhe mbrojtjen e të drejtave të punëmarrësve.
Ndërkohë, Partia Demokratike u ka bërë thirrje aktivistëve dhe forumeve të saj që në orën 12:00 t’i bashkohen protestës në mbështetje të studentëve.
Në orën 14:00 pritet të bashkohen grupet studentore në tubimin e paralajmëruar përpara Kryeministrisë.
Mobilizimi për protestën kombëtare po zhvillohet edhe jashtë kryeqytetit. Studentët nga qytetet e tjera, të cilët gjatë javës kanë protestuar pranë universiteteve të tyre, pritet të udhëtojnë drejt Tiranës gjatë ditës së sotme për t’iu bashkuar tubimit.
Grupet studentore të Tiranës po koordinohen me studentët e rretheve për të organizuar pjesëmarrjen në protestën kombëtare.
