Protestat studentore vijojnë edhe këtë të shtunë, në ditën e 12-të të mobilizimit, me një tubim kombëtar në Tiranë kundër klasës politike në vend.
Sipas njoftimit, studentët do të mblidhen në orën 14:00 para Ministrisë së Arsimit, ndërsa më pas protesta do të zhvendoset para Kryeministrisë.
Në mbështetje të studentëve pritet të dalin edhe pedagogët. Ata kanë njoftuar një tubim në orën 10:00 pranë Universitetit Politeknik. Edhe më herët, Sindikata e Punonjësve të Universiteteve të Shqipërisë (SPUSH) ka shprehur mbështetjen për studentët dhe protestat e zhvilluara në vend.
Ndërkohë, Partia Demokratike u ka bërë thirrje aktivistëve dhe forumeve të saj që të mblidhen në orën 12:00 para Kryeministrisë, në një protestë kombëtare në mbështetje të studentëve dhe të rinjve.
Kështu, gjatë ditës së sotme priten disa tubime në kryeqytet, me pjesëmarrjen e studentëve, pedagogëve dhe përfaqësuesve të opozitës.
#ProtestaStudentore #Studentët #Pedagogët #MinistriaEArsimit #Kryeministria #Tiranë