Ministri i Brendshëm, Ervin Demo, deklaroi se Policia e Shtetit ka identifikuar persona që dyshohet se kanë kryer akte dhune gjatë protestave të ditëve të fundit dhe se procesi i identifikimit do të vijojë deri në përfundimin e hetimeve.
Në një deklaratë për mediat, ku ishte i pranishëm edhe kryeministri Edi Rama, Demo tha se autoritetet po analizojnë materiale nga burime të ndryshme, përfshirë pamjet e televizioneve, kamerat e institucioneve publike dhe private, si dhe videot e publikuara nga vetë protestuesit në rrjetet sociale.
Sipas ministrit, teknologjia po ndihmon në përpunimin e qindra orëve filmime dhe në identifikimin e personave që dyshohet se kanë ushtruar dhunë ndaj policisë, institucioneve dhe pronës private, edhe në rastet kur ata janë përpjekur të fshehin fytyrën me maska.
“Ne kemi në fakt dita-ditës raste, të cilat janë të identifikueshme edhe kur protestuesit kanë fshehur pamjen e tyre nëpërmjet maskave. Ne përsëri kemi arritur që të identifikojmë të gjithë protestuesit, të cilët kanë kryer akte dhune. Ky proces do të vazhdojë”, u shpreh Demo.
Ai theksoi se materialet e mbledhura do të përdoren për ndërtimin e çështjeve që do t’i përcillen Prokurorisë, me qëllim që personat e dyshuar për akte dhune dhe dëmtim të pronës të përballen me drejtësinë.
“Policia e Shtetit është shumë e qartë për sa i përket detyrës që ka, për të sjellë përpara Prokurorisë të gjitha ato çështje që do të ndërtohen për të gjithë personat të cilët kanë kryer dhunë kundër institucioneve dhe pronës private”, deklaroi ministri.
Demo tha se pamjet e publikuara nga mediat dhe institucionet, si dhe videot e shpërndara në rrjetet sociale, kanë ndihmuar në dokumentimin e rasteve. Ai shtoi se përdorimi i teknologjisë po e bën procesin më të shpejtë dhe më të saktë, duke pasur parasysh volumin e madh të materialeve që duhen shqyrtuar.
Në përfundim, ministri garantoi se Policia do të vijojë punën për identifikimin dhe referimin në organet e drejtësisë të personave që dyshohet se kanë dëmtuar pronën publike dhe bizneset private.
“Policia e Shtetit do të punojë çdo ditë, për aq kohë sa duhet, për të vënë përpara drejtësisë të gjithë ata të cilët kanë shkatërruar pronën publike, të gjithë ata të cilët kanë cenuar bizneset private”, përfundoi Demo.