Këngëtarja Ingrit Gjoni është përlotur teksa ka rrëfyer dhimbjen për humbjen e motrës së saj, e cila u nda nga jeta tre vite më parë pas një sëmundjeje të rëndë. E ftuar në emisionin “Live me Luizin”, artistja foli për boshllëkun që kjo humbje ka lënë në familjen e saj dhe për mënyrën se si i ka ndryshuar jetën përgjithmonë.
Gjatë bisedës, Gjoni kujtoi lidhjen e veçantë që kishte me motrat, duke treguar se ato kanë qenë shumë të afërta me njëra-tjetrën.
“E kam të vështirë të flas. Ne kemi qenë të treja si tri pika uji, por nuk i dalim dot kundër vullnetit të Zotit”, u shpreh këngëtarja mes emocionesh.
Edhe pse kanë kaluar tre vjet nga humbja, dhimbja mbetet e fortë. Artistja tregoi se muzika dhe mbështetja e publikut e kanë ndihmuar të gjejë forcën për t’u rikthyer në jetën artistike, vetëm katër muaj pas ngjarjes së rëndë.
“Shpirti më është djegur. Publiku më ka ndihmuar shumë. U riktheva në koncerte shumë shpejt, pas katër muajsh. Ishte një bombë e madhe”, rrëfeu ajo.
Megjithatë, rikthimi në skenë nuk ka nënkuptuar se ajo e ka kapërcyer humbjen. Ingrit Gjoni pranoi se vazhdon ta përjetojë thellë mungesën e motrës dhe se dhimbja mbetet pjesë e përditshmërisë së saj.
“Vetëm kur të martoj djalin mund të arrij të ngrihem e të hedh një valle. E kam shpirtin në zi”, tha këngëtarja.
Ajo tregoi gjithashtu se ishte përgatitur emocionalisht përpara se të merrte pjesë në emision, pasi e dinte se rikujtimi i motrës do ta kishte të vështirë.
“Megjithatë, jam një femër e fortë dhe nuk do të doja të përlotesha, sepse kam punuar me veten para se të vija. Ajo ishte një thesar për familjen tonë”, u shpreh Gjoni.
Rrëfimi i artistes solli në vëmendje lidhjen e fortë me motrën dhe dhimbjen që nuk zhduket me kalimin e kohës. Për Ingrit Gjonin, kujtimet dhe dashuria për të mbeten të gjalla, edhe pse kanë kaluar tre vite nga ndarja e saj nga jeta.