Skiatorja që përfaqëson Shqipërinë, Lara Colturi, e ka nisur në mënyrën më të mirë sezonin e ri të skive alpine, duke u renditur e dyta në garën e zhvilluar në Sölden të Austrisë. Colturi e mbylli konkurrimin vetëm 1 të qindtën e sekondës larg vendit të parë.
Lëshimi i parë nisi me 30 minuta vonesë për shkak të reshjeve të dendura të dëborës. Në këtë fazë të garës, skiatorja shqiptare regjistroi kohën 1 minutë, 8 sekonda e 5 të qindtat, duke u pozicionuar në vendin e gjashtë.
Megjithatë, Colturi arriti të përmirësonte ndjeshëm paraqitjen në lëshimin e dytë, ku regjistroi kohën 1 minutë, 6 sekonda e 78 të qindtat, rezultat që e renditi të tretën në këtë fazë.
Në përfundim të dy lëshimeve, Lara Colturi regjistroi kohën e përgjithshme prej 2 minutash, 14 sekondash e 83 të qindtat, duke siguruar një vend në podium që në garën e parë të sezonit.
Fitorja shkoi për amerikanen Paula Moltzan, e cila ishte vetëm 1 të qindtën e sekondës më e shpejtë se skiatorja që përfaqëson Shqipërinë.
Ky rezultat përbën një nisje fantastike për Lara Colturin, e cila konfirmon nivelin e saj të lartë në skitë alpine dhe e nis sezonin e ri mes konkurrenteve më të mira të disiplinës së slalomit gjigant.