Franca është përfshirë nga një tjetër valë protestash kundër rritjes së kostos së jetesës, ndërsa autoritetet kanë mobilizuar 70 mijë forca sigurie në të gjithë vendin për të parandaluar përsëritjen e dhunës së fundjavës së kaluar. Deri në mesditën e së shtunës, policia kishte arrestuar 135 persona, ndërsa në Lion përdori gaz lotsjellës për të shpërndarë rreth 150 demonstrues që tentuan të bllokonin një rrugë pranë qendrës së qytetit. Ministri i Brendshëm, Laurent Nunez, deklaroi se nuk kishte pasur incidente madhore, por paralajmëroi se autoritetet nuk do të tolerojnë dhunën dhe cenimin e rendit publik. Policia ka sekuestruar sfera metalike, fishekzjarrë, armë të improvizuara dhe një shpatë katana. Në gatishmëri janë vendosur automjete të blinduara, helikopterë dhe mjete me ujë me presion. Në Paris, mijëra qytetarë marshuan kundër pagave të ulëta dhe shtrenjtimit të jetesës.