Kryetari i Partisë Demokratike, Sali Berisha, ka akuzuar efektivët e forcave “Shqiponja” dhe RENEA për ushtrim dhune ndaj protestuesve gjatë protestës në Tiranë, duke paralajmëruar se, sipas tij, çdo punonjës që ka kryer shkelje do të mbajë përgjegjësi ligjore.
Në një deklaratë për mediat, Berisha e përshkroi situatën në kryeqytet si një “ditë dhe natë terrori”, ndërsa ngriti akuza për përdorimin e armëve dhe mjeteve të forcës kundër protestuesve.
Ai u ndal veçanërisht te rasti i Erjon Vishkurtit, për të cilin deklaroi se ka humbur syrin gjatë protestës.
“Erjon Vishkurti humbi syrin. I diplomuar në gazetari, ndërkohë që në absolute nuk po kryente asnjë veprim të dhunshëm ndaj askujt”, u shpreh Berisha.
Sipas kreut të PD-së, gjatë protestës janë plagosur edhe persona të tjerë, mes tyre një protestuese në sy dhe një protestues në zonën mbi vetull. Ai përmendi gjithashtu një person që, sipas tij, është goditur në abdomen dhe ka nevojë për ndërhyrje kirurgjikale.
Berisha: Do të përgjigjeni një për një para ligjit
Kreu i opozitës akuzoi gjithashtu efektivët për dhunë ndaj protestuesve të shtrirë në tokë dhe për shoqërime të paligjshme në komisariate.
Ai përmendi rastin e 40-vjeçarit Lorenco Bezani, për të cilin pretendoi se është goditur me shkelma në kokë dhe në trup, ndërsa nuk po kryente veprime të dhunshme.
Berisha ngriti edhe akuza për sjellje të papërshtatshme të disa efektivëve ndaj vajzave të shoqëruara me automjete policie, por nuk paraqiti në deklaratën e tij prova apo hollësi që të mundësonin verifikimin e këtyre pretendimeve.
“Unë i garantoj shqiponjat e Edi Ramës, banditë të Edi Ramës, shqiponja apo çfarëdo jenë, se akti i parë i përmbysjes, i largimit të padronit të tyre, ato një për një do të përgjigjen para ligjit për krime të shëmtuara”, deklaroi Berisha.
Ai shtoi se punonjësit që, sipas tij, kanë kryer vepra penale duhet të procedohen individualisht, duke paralajmëruar edhe ndryshime në strukturat e policisë në rast të largimit të qeverisë.
Deklaratat e Berishës vijnë pas një proteste të shoqëruar me përplasje mes demonstruesve dhe policisë, përdorim të gazit lotsjellës, autobotit me ujë dhe mjeteve të tjera të forcës.
Rrethanat e plagosjeve dhe pretendimet për shkelje nga ana e efektivëve kërkojnë verifikim nga institucionet përgjegjëse.
