Kryeministri Edi Rama ka prezantuar sot paketën e re ligjore kundër dhunës dhe asaj që e cilësoi si “anarki urbane”. Në një deklaratë për mediat, kreu i qeverisë bëri të ditur se paketa përfshin gjashtë instrumente ligjore, me synimin për të ndëshkuar aktet e dhunës dhe për të garantuar dëmshpërblimin e bizneseve të dëmtuara.
“Kemi gati paketën ligjore të masave kundër dhunës dhe anarkisë. Protesta paqësore mbrohet, dhuna ndëshkohet dhe dëmi paguhet nga shkaktari”, deklaroi Rama.
Sipas kryeministrit, përgjegjësia do të jetë individuale, ndërsa kufizimet e parashikuara do të jenë të përkohshme.
Paketa përfshin një akt normativ për dëmshpërblimin e bizneseve të vogla, një ligj të posaçëm për riparimin e dëmeve të shkaktuara ndaj tyre, ndryshime në ligjin për tubimet, krijimin e një regjistri elektronik të posaçëm për dhunuesit urbanë, ndryshime në kodin e etikës së mësuesve dhe propozime për ndryshime në Kodin Penal të Shqipërisë.
Duke iu referuar akteve të dhunës gjatë protestave, Rama u shpreh se qeveria do të ndërhyjë për të parandaluar përsëritjen e tyre.
“Edhe këtë flamë fatkeqësie jo natyrore do ta shuajmë përballë protestuesve dhunues”, tha kryeministri.