Udhëheqësja e opozitës venezueliane, María Corina Machado, është kthyer në atdhe, në një situatë të tensionuar politike, pas më shumë se 10 muajsh në ekzil.
“Jam këtu. Me ju”, shkroi Machado të dielën në rrjetin social X. Kthimi i saj vjen pas përpjekjeve të përsëritura për t’u rikthyer në vend, të cilat më parë kishin dështuar.
Në janar, një muaj pasi Machado u largua nga Venezuela me një skaf në errësirë, për të marrë Çmimin Nobel për Paqen në Norvegji, Shtetet e Bashkuara arrestuan kundërshtarin e saj, presidentin Nicolás Maduro.
Administrata Trump më pas mbështeti zëvendësen e tij, Delcy Rodríguez, si presidente. Ajo u betua si presidente e përkohshme dhe më vonë nënshkroi një marrëveshje për naftën, e cila i garantonte SHBA-së kushte jashtëzakonisht të favorshme.
Të dielën, Machado u fotografua duke marrë pjesë në meshë në një kishë në Lara, e rrethuar nga mbështetës që e përqafonin dhe i shtrëngonin duart.
Aleati i saj, ish-kandidati presidencial Edmundo González, konfirmoi mbërritjen duke shkruar në një deklaratë: “Jam i emocionuar t’ju njoftoj se udhëheqësja jonë, e dashura ime María Corina, ndodhet në tokën venezueliane.”
“Sot është një ditë shumë e rëndësishme për venezuelianët. Zëri ynë sovran kthehet bashkë me të, për të udhëhequr dhe drejtuar këtë proces!”, tha González.
Ai shtoi se së shpejti do t’i bashkohet Machado-s në Venezuelë për ta çuar vendin “drejt lirisë”.
Nuk është e qartë se çfarë planifikon të bëjë Machado tani që është kthyer, por më parë ajo ka deklaruar se do të kandidonte sërish për presidente nëse do të zhvilloheshin zgjedhje. Mundësia e kthimit të saj në atdhe varej gjithmonë nga miratimi i administratës Trump, i cili duket se tashmë është dhënë.
Si një mbështetëse e vendosur e demokracisë, Machado fitoi zgjedhjet paraprake presidenciale të opozitës në vitin 2023, të organizuara në mënyrë të pavarur nga autoriteti zyrtar zgjedhor i qeverisë Maduro. Ajo siguroi më shumë se 90% të votave.
Pavarësisht fitores në zgjedhjet paraprake, qeveria e Maduros e ndaloi Machado-n të kandidonte për një post publik, duke e akuzuar për mashtrim dhe shkelje të ligjeve tatimore. Machado i mohoi akuzat, duke i cilësuar ato si të motivuara politikisht.
Në zgjedhjet e vitit 2024, aleati i Machado-s, González, kandidoi në vend të saj kundër Maduros.
Autoriteti zgjedhor, i cili është ngushtësisht i lidhur me qeverinë, shpalli Maduron fitues pa publikuar rezultatet e votimit.
Opozita tha se zgjedhjet i kishte fituar González, jo Maduro, dhe publikoi kopje të procesverbaleve të votimit si prova në mbështetje të pretendimeve të saj.
Një zëdhënës i Machado-s e cilësoi kthimin e saj si “një hap të madh drejt një tranzicioni demokratik dhe zgjedhjeve presidenciale të lira, të ndershme dhe të verifikueshme në të ardhmen e afërt”.
“Falënderojmë Presidentin Donald Trump, Sekretarin e Shtetit Marco Rubio, qeverinë amerikane, Kongresin dhe qeveritë aleate për udhëheqjen dhe mbështetjen e tyre të vazhdueshme”, shtoi zëdhënësi i saj, David Smolansky.
Trump tha të dielën se “nuk di asgjë” për kthimin e saj dhe shtoi se shpresonte që ajo të ishte “e sigurt”.
“Unë mendoj se ajo është një grua shumë e mirë. Ajo më dha Çmimin e saj Nobel, kështu që çfarë mund të them tjetër? Shpresoj që të jetë mirë”, tha ai.