Shaip Kamberi: Dy mandate për shqiptarët në Serbi, në garë për të tretin

Politikani shqiptar në Serbi, Shaip Kamberi ka bërë të ditur se Koalicioni Shqiptar ka fituar në zgjedhjet e sotme 27.230 vota sipas rezultateve preliminare.

Ai tha në një postim në Facebook se rritja prej 35% të koeficientëve zgjedhorë për pakicat kombëtare jep vlerën llogaritëse prej 36.761 votash, raporton KosovaPress.

Si prijës i listës Koalicioni Shqiptar, Shaip Kamberi falënderoi qytetarët e Preshevës, Bujanocit dhe Medvegjës për besimin, të gjitha subjektet politike për bashkimin dhe kryeministrin Albin Kurti për angazhimin e tij.

“Ky është rezultati i bashkimit politik, i besimit qytetar dhe i përkushtimit të përbashkët për përfaqësim dinjitoz. Bashkë në zgjedhje, bashkë në përfaqësim, bashkë për të drejtat tona!”