Sulmi me 9 viktima në një kishë në Jordani, arrestohen 3 autorët

Autoritetet jordaneze kanë arrestuar tre të rinj si të dyshuar për sulmin i cili la pas 9 viktima brenda kishës ortodokse në fshatin Hamoud në provincën e Karakut.

Forcat e sigurisë jordaneze arrestuan tre të dyshuar në një operacion herët në mëngjes në lidhje me sulmin e fundit vdekjeprurës.

“Ne i kemi arrestuar vrasësit, po hetojmë të gjitha rrethanat që i shtynë këta të rinj drejt ekstremizmit dhe do të sigurohemi që kushdo që vërtetohet se është i përfshirë të mbahet përgjegjës”, theksoi Ministri i Brendshëm jordanez Mazen al-Faraya nëpërmjet X.

Departamenti i sigurisë publike raportoi se autorët hynë me forcë në kishën ortodokse dhe hapën zjarr gjatë një funerali.

Duke denoncuar aktin “terrorist”, monarku jordanez Abdullah II, i cili vizitoi të plagosurit në Karak, theksoi nëpërmjet X të premten se vendi i tij do të vendoste dënimet “më të ashpra” ndaj autorëve.

Në provincën Karak, me një popullsi totale prej 375,000 banorësh, jeton një bashkësi e madhe të krishterësh.

Të krishterët përbëjnë rreth 3% të popullsisë së Jordanisë e cila është shumica sunite. Mbretëria shpalli tre ditë zie kombëtare duke filluar nga e premtja, me flamuj të ulur në gjysmështizë në ndërtesat qeveritare dhe publike.