Një 37-vjeçar është arrestuar në Roskovec, pasi dyshohet se ka qëlluar me armë zjarri para banesës së ish-bashkëjetueses së tij, në fshatin Luar. Sipas Policisë, ngjarja ka ndodhur për motive të dobëta, ndërsa pas marrjes së njoftimit për të shtënat, shërbimet policore kanë nisur menjëherë veprimet për identifikimin dhe kapjen e autorit të dyshuar.
Në kuadër të operacionit, në bashkëpunim me Komisariatin e Policisë Fier, u bë i mundur identifikimi dhe arrestimi i shtetasit me inicialet B. M., 37 vjeç, banues në Roskovec. Nga hetimet paraprake dyshohet se ai ka qëlluar me armë zjarri përpara banesës ku jetonte ish-bashkëjetuesja e tij. Rrethanat e plota të ngjarjes vijojnë të hetohen nga autoritetet.
Në përfundim të veprimeve të para hetimore, materialet procedurale i janë referuar Prokurorisë për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Dhuna në familje” dhe “Veprime në kundërshtim me vendimin e gjykatës”. 37-vjeçari do të përballet me hetimet për këto vepra penale, ndërsa autoritetet po vijojnë procedurat për zbardhjen e plotë të rastit.
