Majko për humbjen e Vuçiçit: Nuk e rrëzoi askush si tiran, u tërhoq si një figurë e vjetër që i kishte mbijetuar kohës së vet

Ish-kryeministri i Shqipërisë, Pandeli Majko, ka reaguar një ditë pas humbjes së Aleksandër Vuçiçit në zgjedhjet në Serbi, duke bërë një analizë të gjatë mbi fundin e pushtetit të tij dhe modelin e qeverisjes gjatë viteve të fundit.

Në një status në rrjetet sociale, të titulluar “Ikja e Vuçiç…”, Majko argumenton se largimi i presidentit serb nga pushteti nuk erdhi si rrëzim i një tirani, por si tërheqje e një figure politike që, sipas tij, i kishte mbijetuar kohës së vet.

Sipas Majkos, një nga faktorët që ndikuan në këtë zhvillim ishte pamundësia e Vuçiçit për t’iu përgjigjur fuqisë së komunikimit të ri përmes rrjeteve sociale, të cilat ai i përshkruan si të shpejta dhe të zhurmshme.

Ish-kryeministri shqiptar e lidh bilancin politik të Vuçiçit me mënyrën se si ai ushtroi pushtetin dhe me raportin mes institucioneve, politikës dhe interesave ekonomike.

“Historia do ta mbajë mend atë, jo për arritjet por për dështimet! Jo për atë që ndërtoi por për atë që ai shkatërroi!”, shkruan Majko.

Në reagimin e tij, ai vlerëson se tiparet që dikur i kishin shërbyer Vuçiçit për të fituar mbështetje, përfshirë stilin jokonvencional dhe gatishmërinë për të eksperimentuar, u kthyen në dobësi gjatë qeverisjes së tij.

Majko e përshkruan modelin e qeverisjes së presidentit serb si një sistem ku pushteti politik dhe interesat ekonomike, sipas tij, ushqenin njëri-tjetrin, duke dobësuar administratën shtetërore dhe mekanizmat institucionalë të kontrollit.

Ai pretendon se ligjet, administrata dhe strukturat e sigurisë u përdorën për të konsoliduar interesat e një grupi të lidhur me politikën, biznesin dhe krimin e organizuar. Sipas tij, kontrolli mbi institucionet shërbente për të siguruar pasuri, për të mbrojtur aleatët dhe për të dobësuar mekanizmat që mund të pengonin vazhdimësinë e pushtetit.

Duke iu referuar këtij modeli si “doktrina Vuçiç”, Majko argumenton se korrupsioni nuk ishte thjesht një shkelje e veçuar e ligjit, por pjesë e një sistemi të organizuar, ku shteti shndërrohej në mbështetës të interesave të pushtetit.

Në përfundim të reagimit, ish-kryeministri shqiptar e lidh humbjen e Vuçiçit me ndryshimin e raportit të tij me zhvillimet politike.

“Aleksandër Vuçiç humbi dje zgjedhjet! Nga dje, ai nuk i kontrollon më ngjarjet! Tashmë janë ato, që do ta kontrollojnë atë!”, përfundon Majko.