Kryetari i Partisë Demokratike, Sali Berisha, ka reaguar pas zhvillimeve politike në Serbi, duke vlerësuar largimin nga pushteti të Aleksandar Vuçiçit.
Në deklaratën e tij, Berisha e cilësoi atë si një nga figurat më negative të politikës në Ballkan pas Slobodan Millosheviçit, duke e akuzuar për përfshirje në ngjarje të rënda gjatë luftërave në ish-Jugosllavi.
Berisha akuzoi gjithashtu Vuçiçin se ka mbështetur politikat serbomëdha dhe se ka pasur rol në zhvillimet destabilizuese në Kosovë.
Sipas tij, presidenti serb e kishte kthyer Serbinë në një mbështetëse të interesave ruse në rajon, veçanërisht pas agresionit të Rusisë ndaj Ukrainës.
Kreu i PD-së sulmoi edhe kryeministrin Edi Rama, duke pretenduar se ai dhe Vuçiçi kanë bashkëpunuar për ndarjen e Kosovës.
“Dje, populli serb, me votën e tij nxori nga pushteti njërin nga figurat më të zeza të politikës në Ballkan pas Sllobodan Millosheviçit, njeriun që prej vitesh duhej të ishte në burgun ndërkombëtar të Hagës, Aleksandër Vuçiç, ish-badigardin e Sheshelit, birin e tij shpirtëror, pasardhësin e tij.
Pjesëmarrës aktiv në gjenocidin serb në Bosnje Hercegovinë dhe Kroaci. Një nga organizatorët e safarit vrasës të myslimanëve në Sarajevë. Iniciatorin e nismës fatkeqe për t’i dhënë strehë dhe për të fshehur gjatë viteve në kërkim nga drejtësia ndërkombëtare kasapit të Bosnjes, Ratko Mlladiç.
Organizatorin e vrasjeve politike të udhëheqësve të serbëve në Kosovë, Oliver Jovanoviçin. Serbomadhin që edhe dy vite më parë deklaronte në Zubin Patok dhe Zveçan se Serbia do të bëhet më e madhe dhe që dërgonte grupe terroriste në Kosovë
“Aleksandër Vuçiç ishte një kukull e Vladimir Putinit në Ballkan, i cili pas agresionit rus ndaj Ukrainës, e shndërroi Serbinë në prapavijë të fuqishme të Rusisë në rajon.
Ai, me gangsterin tjetër të Ballkanit, narkodiktatorin e Tiranës, Edi Rama, bëri gjithçka për ndarjen e Kosovës, organizuan atentate ndaj udhëheqësve politikë në Kosovë dhe Shqipëri, ndërmorën nisma të porositura nga Kremlini si Ballkani i Hapur, u akuzuan se bashkëpunonin ngushtë në trafiqe kriminale drogë e të tjera ndërkombëtare në komunat në veri të Kosovës”, tha Berisha.
