Kryetari i Grupit Parlamentar të PD-së, Gazment Bardhi, ka reaguar pas deklaratave të Taulant Ballës ndaj studentëve protestues, duke akuzuar qeverinë për sulme ndaj qytetarëve dhe shmangie të llogaridhënies.
“Hajdutët dhe huliganët i keni në Qeveri dhe në Parlament”, deklaron Bardhi, duke kërkuar drejtësi, transparencë dhe barazi para ligjit.
Kujtojmë që pas mbledhjes së grupit parlamentar të PS, Balla duke iu përgjigjur gazetarëve fyeu studentët duke i quajtur huliganë dhe hajdutë.
Reagimi i Bardhit:
Fyerjet dhe balta e hedhur mbi qytetarët që protestojnë janë bërë streha e fundit e një pushteti që nuk dëshiron të përballet me të vërtetën. Shqipëria e di se kush duhet të japë llogari për korrupsionin, abuzimin me pushtetin dhe vjedhjen e besimit të qytetarëve.
Përgjegjësia nuk mund të fshihet pas sulmeve ndaj protestuesve, as të relativizohet përmes propagandës.
Kur qytetarët kërkojnë drejtësi dhe llogaridhënie, ndërsa pushteti përdor votën parlamentare për të penguar arrestimin e zyrtarëve të dyshuar, atëherë lindin pyetje serioze për standardet e barazisë para ligjit. Askush nuk mund të jetë mbi ligjin.
Qytetarët që protestojnë nuk mund të bëhen objekt fyerjesh vetëm sepse kërkojnë përgjegjësi.
Shqipëria ka nevojë për drejtësi, transparencë dhe institucione që mbrojnë interesin publik, jo për një pushtet që u shmanget llogaridhënies dhe sulmon ato që kërkojnë llogari dhe përgjegjësi.
