Ekonomia gjermane jep sinjale rimëkëmbjeje, besimi i bizneseve në nivelin më të lartë që nga 2023

Besimi i bizneseve gjermane u rrit për të gjashtin muaj radhazi në tetor, duke arritur nivelin më të lartë që nga maji 2023, ndërsa përmirësimi i aktivitetit industrial dhe pritshmëritë për investimet publike po mbështesin rimëkëmbjen e ekonomisë më të madhe të Europës. Indeksi i klimës së biznesit i institutit Ifo u rrit në 90.2 pikë në tetor, nga 89.9 pikë në shtator, duke tejkaluar parashikimet e analistëve për 90 pikë, sipas Reuters.

Rritja u mbështet kryesisht nga pritshmëritë më optimiste të kompanive për muajt e ardhshëm, ndërsa vlerësimi i tyre për situatën aktuale ekonomike u përkeqësua lehtë. Indeksi i pritshmërive u rrit në 91.6 pikë, nga 90.4 në shtator, niveli më i lartë në më shumë se katër vjet e gjysmë. Ndërkohë, treguesi i kushteve aktuale të biznesit ra në 88.8 pikë, nga 89.5 një muaj më parë.

“Rimëkëmbja ekonomike po vazhdon”, deklaroi Clemens Fuest, president i institutit Ifo, pas publikimit të rezultateve të sondazhit.

Përmirësimi ishte veçanërisht i dukshëm në industrinë përpunuese, ku kompanitë raportuan rritje të porosive dhe pritshmëri më të favorshme për aktivitetin e ardhshëm. Për herë të parë në më shumë se tre vjet, treguesit e gjendjes aktuale dhe të pritshmërive në këtë sektor kaluan në territor pozitiv. Kompanitë industriale parashikojnë zgjerimin e prodhimit gjatë muajve të ardhshëm, pas rritjes së porosive të reja.

Në të kundërt, besimi në sektorin e shërbimeve u dobësua, pasi kompanitë shprehën më pak kënaqësi me ecurinë aktuale të aktivitetit. Megjithatë, pritshmëritë për muajt e ardhshëm u përmirësuan, veçanërisht te ofruesit e shërbimeve të teknologjisë së informacionit.

Në tregti, klima e biznesit mbeti e pandryshuar, ndërsa sektori i ndërtimit shënoi përmirësim si në vlerësimin e kushteve aktuale, ashtu edhe në pritshmëritë për të ardhmen. Rritja e besimit të bizneseve vjen në një periudhë kur qeveria gjermane ka rishikuar në rritje parashikimet ekonomike, duke pritur një zgjerim të Prodhimit të Brendshëm Bruto prej 1.3% në vitin 2026, nga 0.5% që parashikonte në prill.

Për vitin 2027, qeveria pret rritje ekonomike prej 1.1%, krahasuar me parashikimin e mëparshëm prej 0.9%. Një nga faktorët që pritet të mbështesë aktivitetin ekonomik është programi i investimeve publike prej 500 miliardë eurosh për modernizimin e infrastrukturës, së bashku me rritjen e shpenzimeve për mbrojtjen. Megjithatë, ekonomia gjermane vazhdon të përballet me kostot e larta të energjisë, tarifat tregtare amerikane dhe konkurrencën nga eksportet kineze.

Të dhënat e fundit të Ifo tregojnë një përmirësim të pritshmërive të kompanive, ndërsa aktiviteti aktual ekonomik mbetet më i dobët. Ekonomistët presin një rimëkëmbje graduale gjatë tremujorit të fundit të vitit, të mbështetur nga rritja e shpenzimeve publike dhe kërkesa industriale.