SpaceX ka njoftuar të hënën një marrëveshje financiare me vlerë rreth 40 miliardë dollarë, përmes së cilës një degë e Apollo Global Management do të blejë çipa të inteligjencës artificiale dhe pajisje serverësh, për t’ia dhënë më pas me qira kompanisë së raketave të Elon Musk.
Sipas një dokumenti rregullator, secila kontratë qiraje do të ketë një afat pak më të gjatë se pesë vjet, duke filluar nga momenti i dorëzimit të pajisjeve.
Marrëveshja vjen në një kohë kur SpaceX po rrit ndjeshëm investimet në infrastrukturën kompjuterike, me synimin për të përfituar nga kërkesa në rritje për kapacitete përpunuese të inteligjencës artificiale. Këto investime lidhen gjithashtu me ambiciet afatgjata të kompanisë për eksplorimin e Hënës dhe Marsit.
Kompania synon ta finalizojë marrëveshjen deri në fund të këtij viti, ndërsa pagesat e qirasë pritet të nisin në gjysmën e parë të vitit 2027, pas dorëzimit të çipave.
Të dielën, drejtori ekzekutiv i SpaceX, Elon Musk, deklaroi në platformën X se kompania kishte përfunduar sigurimin e financimit prej 40 miliardë dollarësh në borxh për blerjen e njësive të përpunimit grafik (GPU), të cilat përdoren gjerësisht për zhvillimin dhe funksionimin e sistemeve të inteligjencës artificiale.
Musk bëri të ditur se financimi do të përdoret kryesisht për çipat që pritet të mbërrijnë gjatë tremujorit të parë dhe të dytë të vitit të ardhshëm, duke theksuar se kjo marrëveshje nuk do të ketë ndikim të rëndësishëm gjatë tremujorit aktual.
Ndërkohë, drejtori financiar i SpaceX, Bret Johnsen, kishte deklaruar më herët se kompania pret shpenzime kapitale prej 35 deri në 40 miliardë dollarësh gjatë tremujorit të katërt.
The post SpaceX lidh marrëveshje financiare prej 40 miliardë dollarësh për blerjen e çipave të inteligjencës artificiale appeared first on Euronews Albania.
Burimi: Botë
