Analisti Genc Burimi e sheh zhvillimin e protestave në Serbi dhe sfidat me të cilat përballet Aleksandër Vuçiç si një sinjal që mund të ndikojë edhe në klimën politike në Shqipëri. Në një intervistë për News24, ai argumentoi se këto zhvillime mund të ushqejnë shpresën se protestat kundër qeverisë së Edi Ramës mund të sjellin ndryshime.
Sipas Burimit, demonstratat nuk kanë si objektiv të vetëm largimin e kryeministrit, por synojnë edhe të tërheqin vëmendjen e institucioneve dhe qeverive europiane ndaj situatës politike në vend.
Analisti vlerësoi se mbështetja europiane për qeverinë shqiptare mund të rishikohet nëse partnerët ndërkombëtarë arrijnë në përfundimin se vazhdimi i saj sjell më shumë kosto sesa një ndryshim politik.
Burimi përmendi si mjete të mundshme presioni çështjet që lidhen me drejtësinë dhe kufizimet ekonomike, duke argumentuar se këto mund të përdoren për të nxitur një marrëveshje politike.
“Protesta në Shqipëri ka synim jo vetëm Edi Ramën, por për të nxjerrë nga heshtja edhe kancelaritë europiane”, u shpreh ai, duke shtuar se kryeministrit mund t’i kërkohet të pranojë një qeveri teknike, në të kundërt, sipas tij, largimi mund të ndodhë përmes presionit.
Burimi u ndal edhe te roli i drejtësisë, duke argumentuar se ndryshimi politik duhet të shoqërohet me veprime nga institucionet përgjegjëse. Ai deklaroi se, sipas qëndrimit të tij, kryeministri nuk duhet të vijojë të jetë pjesë e skenës politike dhe se institucionet duhet të veprojnë lidhur me çështjet që e përfshijnë.
